Ամերիկացի թռչնաբան Քրիստոֆեր Ֆիլարդին Սողոմոնյան կղզիների անտառներում հազվագյուտ տեսակի թռչուն է բռնել, որին գիտնականները չեն տեսել ավելի քան 100 տարի, և նրան սատկացրել է նրա անատոմիան ուսումնասիրելու և Նյու Յորքում ԱՄՆ Բնական պատմության թանգարանի հավաքածուի համար խրտվիլակ պատրաստելու համար, որտեղ ինքն աշխատում է: NY Daily News-ի հաղորդմամբ՝ այս մասին Ֆիլարդին գրել է թանգարանի կայքում:
Ֆիլարդին բռնել է շատ հազվագյուտ Actenoides bougainvillei excelsus: Անցած 100 տարում գիտնականներին հաջողվել է այդ թռչունին հանդիպել ընդամենը 2 անգամ՝ 1920 և 1953 թթ., ընդ որում՝ 2 անգամն էլ թռչնաբաններն ուսումնասիրել են էգերի, ոչ մի անգամ արու չեն տեսել:
Ֆիլարդիի բռնած թռչունն արու է եղել: Գիտնականը թռչունին մի քանի անգամ լուսանկարել է, նկարները հրապարակել իր բլոգում, հետո նրան սատկացրել է:
Այդ որոշումը մի շարք դժգոհություններ է առաջացրել կենդանիների պաշտպանների շրջանում:
Հասարակության ճնշումը Ֆիլարդիին ստիպել է ևս մեկ հոդված հրապարակել, որում փորձել է բացատրել իր որոշումը նրանով, որ այդպիսի առիթ իրեն ներկայացել է Սողոմոնյան կղզիներում ուսումնասիրությունների վերջին 20 տարում առաջին անգամ, և որ իր որոշումը պայմանավորված է բացառապես գիտության շահերով:
Նրա խոսքով՝ նշված տարածքում ապրում է այդ թռչունների մոտ 100 առանձնյակ, և նրանցից մեկի կորուստը կրիտիկական չէ պոպուլյացիայի համար:
