ՀՀ ԱԳ նախարար Էդվարդ Նալբանդյանը հայտարարությամբ է հանդես եկել Եվրոպական հանձնաժողովին Հայաստանի հետ բանակցությունների մանդատի տրամադրման վերաբերյալ:
«Կարևորում ենք Եվրոպական Միության խորհրդի կողմից Հայաստանի հետ հարաբերությունների նոր իրավական հիմքի ձևավորման շուրջ բանակցություններ սկսելու վերաբերյալ Եվրոպական Հանձնաժողովին մանդատի տրամադրումը:
Լիահույս ենք, որ բանակցությունների արդյունքում մշակված փաստաթուղթը լավագույնս կարտահայտի Հայաստան-Եվրոպական Միություն փոխշահավետ համագործակցության խորությունը, կարտացոլի հարաբերությունները նոր մակարդակի բարձրացնելու համատեղ հանձնառությունը ու կուրվագծի փոխադարձ հետաքրքրություն ներկայացնող բոլոր ոլորտներում համապարփակ փոխգործակցությունը»,- ասված է Նալբանդյանի հայտարարությունում։
Հիշեցնենք, որ Եվրամիության արտաքին հարաբերությունների խորհուրդը երեկ Եվրոպական հանձնաժողովին և Եվրամիության բարձր ներկայացուցչին լիազորել է Հայաստանի հետ բանակցություններ սկսել նոր, համապարփակ և իրավական ուժ ունեցող համաձայնագրի շուրջ և ընդունել է բանակցությունների համար համապատասխան մանդատ:
Հայաստանում Եվրամիության պատվիրակության հաղորդագրության համաձայն այդ համաձայնագիրը կփոխարինի Եվրամիության և Հայաստանի միջև կնքված Գործընկերության և համագործակցության մասին ներկայիս համաձայնագիրը:
Եվրոպական միությունը իր պատրաստակամությունն է հայտնում Արևելյան գործընկերության շրջանակում երկուստեք հետաքրքրություն ներկայացնող բոլոր ոլորտներում Հայաստանի հետ իր համագործակցությունը շարունակելու և զարգացնելու գործում: Ակնկալվում է, որ բանակցությունները պաշտոնապես կմեկնարկեն մինչ 2015 թվականի ավարտը:
