Մեքսիկական Սյուդադ-Խուարես քաղաքի քաղաքապետ Էնրիկե Սերանո Էսկոբարը կոչ է արել բոյկոտել «Վարձկան կինը» թրիլերը, որում գլխավոր դերը կատարում է Էմիլի Բլանտը: Պատճառն այն է, որ նրանց կարծիքով՝ քաղաքը պատկերվում է այնպես, կարծես այնտեղ տիրում են անօրինականությունն ու բռնությունը՝ հայտնում է The Guardian-ը:
«Շատերը մեծ ջանքեր են ներդնում՝ քաղաքի իմիջը վերականգնելու համար, իսկ հիմա մեր մասին կրկին վատ են խոսում: Եթե դուք այս ֆիլմը դիտեիք ԱՄՆ-ում կամ Եվրոպայում, կգայի՞ք այստեղ: Իսկ եթե դուք մտածում եք ներդրումների մասին, ապա այդ ֆիլմը դիտելուց հետո Սյուդադ-Խուարեսում ներդրումներ կկատարեի՞ք»,- նշել է քաղաքապետը:
Նրա խոսքով՝ ֆիլմի հեղինակների պատկերացումները քաղաքի մասին բավականին հնացել են, քանի որ վերջին 5 տարիների ընթացքում քաղաքում հանցավորության մակարդակը նվազել է 6-7 անգամ:
Թրիլերը ոստիկանության սպա Քեյթ Մեյսիի մասին է, ով ԱՄՆ-ից գալիս է Մեքսիկա և բախվում թմրակարտելների հետ: Ֆիլմը մասնակցել է Կաննի կինոփառատոնի հիմնական մրցույթին:
