Հայաստանում փետրվարի 18-ին հաջորդած ժամանակահատվածում հայաստանյան առցանց լրատվամիջոցները հրաշալի աշխատեցին՝ աշխատանքի բազմակողմանիությամբ, հրատապությամբ գերազանցելով ավանդական լրատվամիջոցներին: «Առաջին լրատվական»-ի հետ զրույցում ասաց «Ազատություն» ռադիոկայանի հայկական ծառայության տնօրեն Հրայր Թամրազյանը՝ գնահատելով առցանց լրատվամիջոցների աշխատանքը քաղաքական վերջին զարգացումների շրջանում և համեմատելով ավանդական և առցանց լրատվամիջոցների աշխատանքը:
Նրա կարծիքով՝ առաջին անգամ առցանց լրատվամիջոցները ցույց տվեցին իրենց հավաքական ուժը՝ առանց բացառության բոլոր առցանց լրատվամիջոցները հրաշալի աշխատելով: Սա էլ, ըստ նրա, ցույց է տալիս այն պոտենցիալը, որն ունի հայկական մամուլը, եթե իհարկե, պայմաններ ստեղծվեն, որպեսզի այդ մամուլը կարողանա ամբողջությամբ ինքնադրսևորվել:
«Այս առումով առցանց լրատվամիջոցներն ավելի նպաստավոր պայմաններում են. ինչպես հայտնի է առցանց լրատվամիջոցներում վերահսկողության փորձերը շատ ավելի սահմանափակ են, ցանցային լրատվամիջոցները շատ ավելի ազատ են, քան հեռարձակվող լրատվամիջոցները, ուստի այս լրատվամիջոցներն ավելի օբյեկտիվ ու համակողմանի են կարողանում լուսաբանել ցանկացած իրադարձություն: Ես ցանկանում եմ հատուկ ընդգծել այն առցանց լրատվամիջոցների դերը, որոնք կարողացան ապահովել ուղիղ հեռարձակում: Այստեղ «Ազատություն» ռադիոկայանը ևս, կարծում եմ, շատ կարևոր դեր խաղաց՝ ցույց տալով, որ կարելի է հենց առցանց լրատվամիջոցի միջոցով իրադարձությունը փոխադրել ունկնդիրների, հեռուստադիտողների բնակարան, որտեղ նրանք կարող են տանը նստած հետևել, թե, օրինակ, ինչ է կատարվում Ազատության հրապարակում»,- նշեց Հրայր Թամրազյանը:
Վերջինս ասաց, որ առցանց լրատվամիջոցներում հրաշալի լուսաբանումից բացի, նկատելի են նաև առցանց լրատվամիջոցների վերլուծական հնարավորությունները, վերլուծական միտքը, որով ևս առցանց լրատվամիջոցները գերազանցում են ավանդական մեդիային: Ըստ նրա՝ առցանց մեդիան այս իմաստով ևս շատ դինամիկ զարգացող է, մեծ հնարավորություններ է տալիս վերլուծական մտքի ինքնադրսևորման համար: Այս դեպքում ևս Հրայր Թամրազյանը փորձեց իր ղեկավարած լրատվամիջոցի օրինակը ներկայացնել: «Ենթադրենք՝ Ազատության հրապարակում հանրահավաք է, մեզ անհրաժեշտ են վերլուծաբաններ, որոնք, հենց իրադարձությանը հետևելով, կտան իրենց առաջին վերլուծությունը, թե ինչ է տեղի ունենում Ազատության հրապարակում: Առցանցը տալիս է այդ հնարավորությունը, իսկ ավանդական հեռուստատեսությունն այդ հնարավորությունը չի տալիս: Հենց այդ պահին կարող եմ հրավիրել լավագույն վերլուծաբաններին, զուգահեռաբար ցուցադրելով Ազատության հրապարակում հանրահավաքը, և վերլուծել այդ ամենը: Սա այս լրատվամիջոցների առավելությունն է»,- ասաց «Ազատություն» ռադիոկայանի հայկական ծառայության տնօրենը: Ըստ նրա՝ առցանց լրատվամիջոցները սկսել են այսքան դինամիկ և լավ աշխատել այն պատճառով, որ ճնշումներն այս լրատվամիջոցների, խոսքի ազատության նկատմամբ շատ ավելի սահմանափակ են, քան նախորդ տարիներին:
Հարցին՝ Հայաստանում ինչի՞ կարող է հանգեցնել առցանց մեդիայի այսչափ դինամիկ զարգացումը, Հ. Թամրազյանը պատասխանեց, թե չի կարծում, որ առցանց մեդիայի զարգացման արդյունքում ավանդական մեդիահարթակները կվերանան, տեղի է ունենալու հակառակ գործընթացը՝ ավանդական մեդիահարթակները, հեռուստակայանները, ռադիոկայանները փորձելու են տեղափոխվել առցանց հարթակ: Նրա կարծիքով՝ մամուլի տարբեր տեխնիկական հնարավորությունների միջև տեղի կունենա կոնվերգենցիա՝ սերտաճում: «Եթե մի լրատվամիջոց չունի դինամիկ առցանց լրատվամիջոց, որտեղ կկարողանա իր բովանդակային ողջ հարստությունը տեղադրել, պետք է փորձի ստեղծել այդ հարթակը: Սա կլինի հենց այն, ինչ կոչում են կոնվերգենցիա: Եթե նկատել եք, CNN-ն այսօր ամենաուժեղ առցանց լրատվական ցանցն ունի, և զարմանալի է, որ չեմ տեսնում առաջատար հեռուստաընկերությունների ջանքերը առցանց հարթակների ձևավորման ուղղությամբ: Ինչ վերաբերում է առցանց մեդիային, կարծում եմ, որ մյուս կողմից՝ այս լրատվամիջոցները կձգտեն ունենալ ավանդական լրատվական դաշտի հնարավորությունները: Մենք, օրինակ, ունենք «Ազատություն» ռադիոկայանը, բայց եթե լինի գործընկեր, որը համաձայնի մեր ողջ վիզուալ արտադրանքը ներկայացնել, մեծ հաճույքով կտրամադրենք և կհամագործակցենք: Սա այն է, ինչ պետք է տեղի ունենա»,- նշեց Հրայր Թամրազյանը:
Ամփոփելով իր խոսքը՝ նա ասաց, որ բոլորս մեկ գործի համար ենք աշխատում, այն է՝ տեղեկացնել մեր ունկնդիրներին, հեռուստադիտողներին, մեր համերկրացիներին, թե ինչ է տեղի ունենում երկրում, և նրանց հնարավորինս տեղեկացված քաղաքացիներ դարձնել, որոնք կկարողանան ճիշտ որոշումներ կայացնել իրնեց քաղաքական ակցիաներում: Սա, ըստ նրա, այսօր կարծես թե հաջողվում է:
