Թուրքական Dünya Bülteni լրատվական կենտրոնի փոխանցմամբ՝ Անկարայի այսօրվա պայթյունները, որոնց հետևանքով վերջին տվյալներով զոհվել է 30 և վիրավորվել է 126 մարդ, ազդել են նաև երկրի քաղաքական կյանքի վրա։
Իրենց բոլոր ծրագրերը չեղյալ են հայտարարել «Արդարություն և զարգացում» կուսակցությունը (ԱԶԿ), ընդդիմադիր «Ժողովրդա-հանրապետական» կուսակցությունը (ԺՀԿ) և քրդամետ «Ժողովուրդների դեմոկրատական» կուսակցությունը (ԺԴԿ)։
Կուսակցություններն արդեն իսկ արձագանքել են Անկարայի պայթյուններին։ ԱԶԿ-ի խոսնակ Օմեր Չելիքը հայտարարել է, որ պայթյուններն ուղղված են թուրք ժողովրդի դեմ և դրանք որակել է որպես խոշոր սադրանք։ Չելիքի խոսքերով՝ դա իրենց պատմության ամենացավալի իրադարձություններից մեկն է։
ԺՀԿ առաջնորդ Քեմալ Քըլըչդարօղլուն իր հերթին դատապարտել է այդ պայթյունները՝ հայտարարելով, որ իրենք ահաբեկչության դեմ պայքարում պատրաստ են ամեն ինչի և ցանկանում են վերջ դնել ահաբեկչությանը։ Քըլըչդարօղլուն ահաբեկչության դեմ պայքարում աջակցություն է հայտնել Թուրքիայի կառավարությանը։
Իսկ ԺԴԿ համանախագահ Սելահաթթին Դեմիրթաշն Անկարայի պայթյունները նմանեցրել է Դիարբեքիրի ու Սուրուչի պայթյուններին՝ հայտարարելով, որ իրենք խաղաղություն են ցանկանում երկրում։ Նա Անկարայի հարձակման պատասխանատվությունը դրել է ԱԶԿ-ի ու կառավարության վրա՝ հայտարարելով, որ տեղի ունեցածի պատճառը նրանք են, և որ նրանց պատճառով է երկրում արյուն թափվում։
