Այսօր Րաֆֆի Հովհաննիսյանի հրավիրած հանրահավաքին առաջին անգամ ելույթ է ունեցել նրա ավագ որդին՝ Կարին Հովհաննիսյանը: Նա ասել է, որ իր խոսքերը չընդունեն որպես որդու գովասանք՝ ուղղված հորը:
«Այս մարդն այլևս իմ հայրը չէ, փետրվարի 18-ից նա արդեն պատկանում է ձեզ, պատկանում է պայքարին, պատկանում է պատմությանը»,-իր ելույթը այսպես սկսեց Կարին Հովհաննիսյանը:
Նա ասաց, որ իր հայրը 25 տարի առաջ վերադարձել է հայրենիք, 25 տարի ապրել է և քայլել է ձեր մեջ և ով իր վրա վերցրել է ձեր խայտառակ ցավն ու սերը:
«Այս մարդը, ում շատ հաճախ ծաղրել են իր սիրո համար, ես էլ եմ ծաղրել, բայց նա սիրել է: Շատ հաճախ նրան ծաղրել են իր ժպիտի համար, ես էլ եմ ծաղրել, բայց նա ժպտացել է: Ո՞վ է այս ժպտերես զինվորը, շատերը չհասկացան, ես էլ շատ հաճախ չեմ հասկացել, բայց ես գտել եմ մի նամակ, որը տարիներ առաջ եմ նկատել իր գրասեղանին, բայց վերջերս համարձակվեցի բացել և ընթերցել»:
Կարին Հովհաննիսյանը ընթերցեց Գասպար Հովհաննիսյանի՝ 70թ. գրված վերջին նամակը իր թոռանը՝ տասը տարեկան Րաֆֆիին, որտեղ նշված էր. «Իզուր չէ, որ քո անունը Րաֆֆի դրվեցավ, հուսանք որ օր մըն ալ Մասիսի գագաթին դրոշակ մը կբարձրացնես: Րաֆֆին մեծ վիպագիր էր, իր գրվածքներով Րաֆֆին հայերին մղել է թուրքերի դեմ, որ ունենանք մեր պատմական հողերը: Այսօր ունենք փոքր Հայաստան, բայց այն ամբողջը չէ, ձեր սերունդը պետք է տիրանա մեծ Հայաստանին իր աշխատանքով, որտեղ պետք է հավաքվեն բոլոր հայերը»:
Կարինը հավելեց, որ նամակը կարդալով հասկացել է, որ սա ոչ թե Գասպարի նամակն է Րաֆֆին, սա ամեն մի հայի նամակն է իր թոռանը, այս նամակը գալիս է պատմության խորքից, այս նամակը տեսել է և՛ կայսրություն, և՛ ցեղասպանություն, և՛ պատերազմ, և այսօր ազատության հրապարակը սա ժառանգություն է հայի, սա պայմանագիր է՝ կնքված բոլոր ժողովուրդների միջև, որը ասում է՝ մենք չենք հանձնվելու.
«Չկասկածեք, չկասկածեք հայ ժողովուրդ, մենք պայմանավորված ենք պատմության հետ, մենք ժամադրված ենք ճակատագրի հետ, և երբ այս նամակը բռնում եմ իմ ձեռքում, այս կեպարը իմ հայրն է դառնում, որ ունի պատասխանատվություն ոչ միայն ձեր առաջ, այլ իր պապերի առաջ, ովքեր կարող էին երազել այս պահի համար: Ես ինձ լիազորված եմ զգում ասելու բոլոր կասկածողներին, որ այս մարդուն չեք կարող կոտրել, այս ժողովրդին չենք կարող կոտրել, այս երկիրը չեք կարող կոտրել, և չեք կարող կոտրել այս երազանքը, այս հավատամքը որի անունն է Հա- յաս-տան:
