«Ես Հոկտեմբերի 27-ի մասին ֆիլմ չեմ նկարում։ Էդպիսի բան չկա։ Ես չեմ ասել, որ կինո եմ նկարում»,- «Առաջին լրատվական»-ի հետ զրույցում ասաց ԱԺ նախկին պատգամավոր, գործարար Հակոբ Հակոբյանը։
Հիշեցնենք, սակայն, որ երեկ news.am-ի, իսկ ավելի վաղ տարբեր լրատվամիջոցների հետ զրույցում Հակոբյանն ասել էր, որ պատրաստվում է ֆիլմ նկարել և «ցույց տալ, թե վախկոտ պատգամավորներն ինչպես էին իրենց պահում հոկտեմբերի 27-ին դահլիճում»։
«Ես Հոկտեմբերի 27-ին դահլիճում պատգամավորների պահվածքն եմ ուզում ներկայացնել, որ հասարակությունը տեսնի` ինչպիսի պատգամավորներ ենք ունեցել: Ֆիլմի գաղափարը կա, ես կփորձեմ: Դրա մասին ես նախ հաղորդումներով կխոսեմ, հարցազրույցներ կտամ, հետո կակտիվացնենք: Ես ուզում եմ ներկայացնել, որ կան վախկոտ, քծնող մարդիկ, այնպիսի մարդիկ, ովքեր մինչև էսօր պատգամավոր են, բայց հոկտեմբերի 27-ին ինչպես էին իրանց պահում: …Հասարակությունը պիտի իմանա՝ ինչ է կատարվել հոկտեմբերի 27-ին դահլիճում»,- ըստ news.am կայքի՝ ասել է Հակոբյանը։
«Ես այդպիսի բան չեմ ասել, իրենք իմ գլխին սարքել են, վերնագիր են դրել, սկանդալ են սարքել։ Ես չեմ ասել, որ ֆիլմ եմ նկարում։ Ինձ դա պետք չի։ Ես հիմա կոմեդիա եմ նկարում»,- ասաց Հակոբյանը։
Մեր դիտարկմանը, թե գուցե Հոկտեմբերի 27-ի մասին ֆիլմ նկարելու մասին հայտարարություններից, մարդկանց դիմակը պատռել ցանկանալուց հետո սպառնացե՞լ են իրեն, որ հետ կանգնի այդ գաղափարից, Հակոբյանը նկատեց. «Ոչ՝ իհարկե։ Հիմա ո՞ր թիվն է, որ մարդուն սպառնան կամ ճնշեն, որ կինո չնկարի։ Գեղարվեստական ֆիլմը ազատ է, ազատություն է, ով ինչ պատկերացնում է, ինչպես պատկերացնում է՝ այնպես էլ նկարում է։ Կամ ով ինչ ուզի՝ կնկարի, ո՞վ կարող է սպառնալ»:
Հակոբյանը հավելեց՝ կապ չունի, որ Հոկտեմբերի 27-ը քաղաքական հարց է ու քաղաքական թեմա։ «Մեկ անգամ էլ հավելեմ, էդ թեման փակված է։ Ես Հոկտեմբերի 27-ի մասին ֆիլմ չեմ նկարում։ Հիմա իմ թիմը մի կոմեդիայի վրա է աշխատում»։
Բացի դրանից, Հակոբյանն ասաց, որ ուժի մեջ է նաև Գրիգոր Լուսավորչի մասին ֆիլմը։ Այդ ֆիլմի ստեղծագործական խումբն էլ երկու մասի է բաժանվել։ Նրա խոսքով՝ վիճելի հարցեր կան, աշխատում են սցենարի վրա, որից հետո կսկսվեն նկարահանումները։
