10 օրվա ընթացքում Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործը կմտնի դատարան: «Առաջին լրատվական»-ի հետ զրույցում ասաց տուժող կողմի փաստաբան Գարիկ Գալիկյանը՝ հավելելով, որ օբյեկտիվ նախաքննություն է կատարվել, ի հայտ են եկել սպանության մասով բազմաթիվ նոր դրվագներ, որոնք ամբողջապես չի կարող հրապարակել՝ ելնելով պաշտպանական մարտավարությունից: Դրվագներից մեկը վերաբերում է նրան, թե երբ է մահը վրա հասել, կան դատաբժշկական փորձաքննության արդյունքներ:
Հիշեցնենք, որ հունվարի 29-ին՝ ժամը 06:35-ի սահմաններում, հայտնաբերվել էր Հայկազ Բարսեղյանը՝ պտտաձողի վրա պարանով կախված վիճակում: ՀՀ քննչական կոմիտեում հարուցված քրեական գործով մեղադրանք է առաջադրվել Հ. Բարսեղյանի 4 համածառայակիցներին՝ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար:
Դեպքից հետո հարուցվել է այլ քրեական գործ՝ ՀՀ քրեական օրենսգրքի 375-րդ հոդվածի 1-ին մասի հատկանիշներով, և մեղադրանք է առաջադրվել ինստիտուտի սպա, դասակի հրամանատար Արտյոմ Ավետիսյանին: Սպանության մեջ կասկածվողները իրենց մեղքը չեն ընդունում, փաստաբանները պնդում են, որ գործով վկաների և կասկածվողների վրա ճնշում է գործադրվում, նրանք պատանդի կարգավիճակում են: Տուժողի ներկայացուցիչ Գարիկ Գալիկյանը, անդրադառնալով կասկածյալների պնդումներին, նշեց, որ չի ուզում խախտել անմեղության կանխավարկածը, բայց կան վկաներ, ցուցմունքներ:
Փաստաբանը մանրամասնեց, որ եթե դատարանում մեղադրանքը հաստատվեց, սպանությունը իրականացնողներին սպառնում 12 տարուց մինչև ցմահ ազատազրկում:
