Սննդամթերքի անվտանգության պետական ծառայության ղեկավար Աբրամ Բախչագուլյանը կարծես թե իր հովանու տակ է վերցրել ձու արտադրողներին: «Ժողովուրդ»-ն իր նախորդ համարներից մեկում տեղեկացրել էր, որ Երևանի խանութներում Զատկի տոնից առաջ սկսել են վաճառել «Արաքս թռչնաֆաբրիկա»-ի արտադրած ներկված ձվեր, որոնց վրա բացակայում են օրենքով սահմանված նշումները, տուփի վրա գրված չի եղել, թե ինչ տեսակի ձու է, երբ է արտադրված, եփված է, թե ոչ, ինչ ներկով է ներկված և այլն: Դեռ ավելին, կճպելուց հետո ձվերը տարօրինակ հոտ են ունեցել:
Թեև «Ժողովուրդ»-ի հրապարակումից հետո այդ ձվերի ողջ խմբաքանակը հանվել է խանութներից, սակայն Բախչագուլյանի ղեկավարած կազմակերպությունն առ այսօր որևէ քայլ չի ձեռնարկել մեղավորներին պատասխանատվության ենթարկելու համար: Խոստովանենք՝ Ա. Բախչագուլյանից այլ բան չէր էլ կարելի սպասել: Ի վերջո, այս անձնավորությունը նախկինում եղել է ԿԸՀ փոխնախագահը և անմիջական մասնակցություն ցուցաբերել ընտրակեղծիքներին:
