Ճապոնիայի ոստիկանությունը յակուձա մաֆիայի՝ երկրի խոշորագույն «Յամագուտի-գումի» սինդիկատի պառակտումից հետո ձերբակալել է հանցավոր խմբավորումների 29 անդամի, նաև ավելի քան 20 խուզարկություն է կատարել: TASS-ի հաղորդմամբ՝ այս մասին մամլո ասուլիսի ժամանակ հայտարարել է Ազգային ոստիկանական վարչության ղեկավար Մասահիտո Կանետական:
«Մենք մաֆիայի ներսում ընթացիկ հակամարտությունների մասին ստույգ տվյալներ չունենք, սակայն պատրաստ ենք բոլոր ջանքերը ներդնել քաղաքացիների անվտանգության ապահովման համար»,- ասել է նա:
Ճապոնիայի ոստիկանության տվյալներով՝ ձերբակալություններ եղել են ինչպես «Յամագուտի-գումի»-ում, այնպես էլ՝ առանձնացած «Կոբե Յամագուտի-գումի» խմբավորումում: Ճապոնացի իրավապահները շարունակում են բարձր պատրաստականության վիճակում լինել մտավախությունների պատճառով, որ մաֆիայում պառակտումը կհանգեցնի ազդեցությունների ոլորտների արյունահեղ վերաբաժանման:
Սեպտեմբերի սկզբին «Յամագուտի-գումի» գլխավոր սինդիկատից առանձնացել է մոտ 3 000 մարդ՝ կազմավորելով «Կոբե Յամագուտի-գումի» նոր մաֆիոզ բջիջը: Այն գլխավորել է 67-ամյա Կունիո Օնոուեն, որը այլ ՝«Յամակեն-գումի» սինդիկատի բոսն է:
«Յամագուտի-գումի»-ն միավորում է մաֆիայի 13 տարբեր սինդիկատ և խմբավորում: ՝«Յամակեն-գումի»-ի կազմում մոտ 2 000 մարդ կա, որոնք փաստացի կազմել են «Յամագուտի-գումի»-ի կմախքը:
Ներկայումս «Յամագուտի-գումի»-ում ընդգրկված է մոտ 20 000 մարդ ամբողջ երկրում:
