«Մենք ոչ մի նոր ցուցմունք չենք տվել, ոչ էլ փոխել ենք մեր ցուցմունքը, որը կարող էր իրավիճակ փոխել, ու մեղավորները ազատ արձակվեին։ Մենք միշտ էլ պնդել ենք մեր նախկին ցուցմունքները»,- «Առաջին լրատվական»-ի հետ զրույցում ասաց Սդղի գյոլ կոչվող վայրում Սյունիքի մարզպետ Սուրիկ Խաչատրյանի որդու կողմից ծեծի ենթարկված Հարութ Զաքարյանի հայրը՝ Գագիկ Զաքարյանը։
Հիշեցնենք, որ մի քանի լրատվամիջոց, հղում անելով իրենց աղբյուրներին, գրել են, որ տուժող կողմը նոր ցուցմունք է տվել և հայտնել է, որ իրեն Տիգրան Խաչատրյանը ծեծի չի ենթարկել:
Գագիկ Զաքարյանը, «Առաջին լրատվական»-ի հետ զրույցում նշեց, որ իր որդին չէր էլ կարող նման ցուցմունք տալ, քանի որ արդեն 2 ամիս է՝ Մոսկվայում է։
«Իմ տղան հուլիսի 25-ից Մոսկվայում է։ Վաղը պատրաստվում ենք 7-րդ վիրահատությանը, հաջորդը դեկտեմբեր ամսին է։ Ու հետո ասեմ, որ ցուցմունք տալը խաղ ու պար չի, որ գրենք, հետո փոխենք կամ հետ վերցնենք։ Մենք միշտ էլ նշել ենք մեղավորներին ու վստահ ենք, որ քննությունը ամեն հարցի պատասխանը կտա, ու մեղավորները կպատժվեն։ Մենք միշտ բողոքել ենք ու հիմա էլ բողոքում ենք»,- հավելեց Զաքարյանը։
Հարութ Զաքարյանի բժիշկները հիմա պայքարում են աչքի սնուցման համար։ Վերջին վիրահատությունը կլինի դեկտեմբերին, որից հետո նոր պարզ կլինի՝ տեսողության վերականգնման հավանականություն, հույս կա՞, թե՞ ոչ։ «Բայց մենք մեր հույսը չենք կորցնում»,- ասաց Հարութի հայրը։
