ԵԱՀԿ-ի պաշտոնական կայքի փոխանցմամբ՝ ԵԱՀԿ Մինսկի խումբը հայտարարություն է տարածել, որում նշված է. «ԵԱՀԿ Մինսկի խմբի համանախագահները (դեսպաններ Իգոր Պոպովը (Ռուսաստան), Ջեյմս Ուորլիքը (ԱՄՆ), Պիեռ Անդրիեն (Ֆրանսիա), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը լուրջ մտահոգություն են հայտնել խաղաղ բնակչության շրջանում Հայաստանի ու Ադրբեջանի զինված ուժերի կողմից ականանետներ և ծանր սպառազինություն կիրառելու կապակցությամբ։
Նման սպառազինության կիրառումը անընդունելի է հակամարտության էսկալացման տեսանկյունից։ Մենք մեր խորին ցավակցություններն ենք հղում զոհվածների ընտանիքներին ու խորապես մտահոգված ենք միջազգային սահմանի ու շփման գծի յուրաքանչյուր կողմում կորուստների կապակցությամբ։
Մենք ամենավճռական արտահայտություններով դիմում ենք կողմերին, որպեսզի նրանք խուսափեն քաղաքացիական բնակչության շրջանում զոհեր պատճառելուց։ Կողմերը, Ժնևյան կոնվենցիաներին համապատասխան, պարտավորվել են պաշտպանել խաղաղ բնակիչների անվտանգությունը։
Մենք ցավում ենք, որ այդ միջադեպերը գրանցվել են Նյու Յորքում Հայաստանի ու Ադրբեջանի արտգործնախարարների կողմից նախագահների հանդիպումը համաձայնեցնելու շեմին։ Մենք ակնկալում ենք, որ նախարարները լրջորեն կքննարկեն բռնությունների աճի ու բանակցային ճանապարհով հարցը կարգավորելու խնդիրները։ Միևնույն ժամանակ մենք չենք կարող վստահ ասել, թե ինչպես ծագեց բռնությունը, քանի որ կողմերից յուրաքանչյուրը մեղադրում է մյուսին։ Կողմերը պետք է աշխատեն ԵԱՀԿ միջադեպերի հետաքննման մեխանիզմի մշակման ուղղությամբ, ինչպես որ դա քննարկվել է նախագահների հանդիպման ժամանակ։
Մենք շարունակելու ենք բարձր մակարդակով մեր աշխատանքը կողմերի հետ՝ լարվածության ապաէսկալացմանն ու ամուր և խաղաղ կարգավորման հարցում առաջ գնալուն հասնելու նպատակով»։
