Կուբան երախտապարտ է Հռոմի պապին Հավանայի և Վաշինգտոնի միջև երկխոսության գործում ունեցած ներդրման համար՝ հայտարարել է Կուբայի առաջնորդ Ռաուլ Կաստրոն հովվապետին դիմավորելու պաշտոնական արարողության ժամանակ:Այս մասին տեղեկացնում է ria.ru-ն:
«Մենք երախտագիտություն ենք հայտնում Ձեզ ԱՄՆ-ի և Կուբայի միջև երկխոսությանն աջակցելու համար»,- հայտարարել է Կուբայի առաջնորդը:
Նրա խոսքով՝ երկու երկրների միջև դիվանագիտական հարաբերությունների վերականգնումը «արդարության վերականգնման և խնդիրների լուծման» ճանապարհին արված առաջին քայլն է:
«Շրջափակումը, որը վնաս է հասցնում մարդկանց, որը զրկանքներ է բերում կուբացի ընտանիքներին, դաժան է, անբարո և անօրինական, և այն պետք է դադարեցվի: Տարածքը, որ ուզուրպացվել է Գուանտանամոյի բազայի կողմից, պետք է վերադարձվի Կուբային»,- ասել է նա և ավելացրել, որ այդ արդար պահանջները կիսում է ամբողջ աշխարհի երկրների մեծ մասը:
Հռոմի պապի առաքելական այցը Կուբա կտևի մինչև սեպտեմբերի 22-ը: Կաթոլիկների առաջնորդը պատարագ կմատուցի երկրի մայրաքաղաքում և արևելյան շրջաններում, պաշտոնական բանակցություններ կունենա Ռաուլ Կաստրոյի հետ, ինչպես նաև կայցելի կուբացիների համար սուրբ վայրեր:
