Արցախի Հանրապետության վարչապետ Արայիկ Հարությունյանը սեպտեմբերի 19-ին Շուշիում մասնակցել է «Եզնիկ Մոզիյան արհեստագործական ուսումնարան» հիմնադրամի հոգաբարձուների խորհրդի առաջին նիստին, որի ընթացքում, այլ հարցերի շարքում, հաստատվել է խորհրդի կազմը՝ վարչապետի նախագահությամբ: Ինչպես տեղեկացրին ԱՀ կառավարության աշխատակազմի տեղեկատվության և հասարակայնության հետ կապերի բաժնից, Արայիկ Հարությունյանն իր խոսքում ընդգծել է նորաբաց ուսումնարանի` որպես կրթական կառույցի և արհեստների դարբնոցի հետագա նշանակությունն Արցախի կենսագործունեության համար:
«Այս նիստով մենք հիմք ենք դնում մի բացառիկ հաստատության, որը նոր շունչ է բերելու հանրապետության թե՛ կրթական համակարգին, թե՛ շինարարության ոլորտին: Երախտագիտության արժանի է այս գործում ընդգրկված բոլոր կառույցների և անհատների կատարած աշխատանքը, քանի որ այն երկարաժամկետ ներդրում է հանուն Արցախի լուսավոր ապագայի: Համոզված եմ, որ հոգաբարձուների խորհրդի անդամները ջանք ու եռանդ չեն խնայելու կրթօջախի զարգացման և արդյունավետ գործունեության ապահովման համար»,- նշել է վարչապետ Հարությունյանը:
Նիստում հաստատվել է ուսումնարանի տնօրենի պաշտոնը, որից հետո տնօրեն Վասպուրակ Կարապետյանը խորհրդին է ներկայացրել նախընթաց աշխատանքների և 2015-2016 ուսումնական տարվա ուսումնական պլանների վերաբերյալ զեկույց: Հոգաբարձուները հաստատել են նաև կրթօջախի տարեկան նախատեսված բյուջեն: Խորհուրդը համապատասխան որոշումներ է կայացրել օրակարգում ընդգրկված մյուս հարցերի շուրջ ևս:
Նիստի ավարտին Արայիկ Հարությունյանը ԱՀ վարչապետի հուշամեդալով պարգևատրել է «Ֆրանսիայի հայկական հիմնադրամի» նախագահ Պետրոս Թերզյանին և Ֆրանսիայի արհեստագործական կրթության ոլորտի պատասխանատու Էրիկ Լեմարիին՝ Արցախի կրթության բնագավառում ունեցած զգալի ներդրման համար:
Գործադիրի ղեկավարն այնուհետև մասնակցել է ուսումնարանի բացման հանդիսավոր արարողությանը, որը տեղի է ունեցել «Ֆրանսիական օրեր Արցախում» խորագիրը կրող փառատոնի շրջանակներում: «Եզնիկ Մոզիյան արհեստագործական ուսումնարանը» հիմնադրվել է ֆրանսիահայ մեծանուն բարերար Եզնիկ Մոզիյանի կտակի հիման վրա: Ուսումնարանի հիմնադիրներն են ԱՀ կառավարությունը, «Ֆրանսիայի հայկական հիմնադրամը» և Եզնիկ Մոզիյանի ընտանիքի ներկայացուցիչ Ռոբերտ Այդաբիրյանը, իսկ Շուշիում տեղակայված շենքի կառուցման և ուսումնարանի հետագա գործունեության ֆինանսավորումը կատարվում է ԱՀ կառավարության և «Ֆրանսիայի հայկական հիմնադրամի» կողմից: Հոգաբարձուների խորհրդի կազմում ընդգրկվել են ներկայացուցիչներ Արցախից, «Հայաստան» համահայկական հիմնադրամից և Ֆրանսիայից՝ ներառյալ ազգությամբ ֆրանսիացի մասնագետներ:
Ուսումնարանը տրամադրելու է նախնական արհեստագործական եռամյա կրթություն, որը գործելու է երկակի համակարգով՝ ուսուցման գործընթացում ընդգրկելով կրթական հաստատությունը և շինարարական ընկերությունները: Գլխավորապես շինարարական արհեստներ ուսուցանող կրթօջախը մեկնարկային տարում արդեն ընդունել է շուրջ 70 աշկերտ ԱՀ բոլոր շրջաններից և Սյունիքից, որոնց դասավանդումը կազմակերպվելու է Ֆրանսիայում վերապատրաստված հայազգի և հրավիրյալ ֆրանսիացի դասախոսների կողմից:
