Երբ ասում ենք վերահսկող լծակներ տվեք մեզ, ասում ենք՝ տվեք ընդդիմությանը: Քիչ առաջ Ազատության հրապարակում այս մասին ասաց «Ժառանգություն» խմբակցության ղեկավար Ռուբեն Հակոբյանն՝ անդրադառնալով ներքաղաքական զարգացումներին:
Նա նշեց, որ եթե ամեն դեպքում սկսվի բանակցություն Րաֆֆի Հովհաննիսյանի ու Սերժ Սարգսյանի միջև, իրենց առաջարկած ծրագրերի տրամաբանությունը պետք է պահպանվի, պետք է ժողովրդի տրամադրությունները ևս հաշվի առնվի: Սակայն, ըստ Ռուբեն Հակոբյանի, եթե ցանկություն կա երկխոսության, պետք է խուսափել հում, եփած, կիսաեփած բառերից:
«Դրանք պետք է վերագրել այն խորհրդականներին, որոնք կազմում են այս փաստաթղթերը»,- նկատեց բանախոսը:
Վերջինս նշեց, որ երբ «Ժառանգության» առաջնորդն ասում է վերահսկող լծակներ պետք է տալ իրենց, նկատի ունի ողջ ընդդիմադիր դաշտին: « Մենք խնդիր չենք դրել, բայց որոշ մարզպետեր իսկապես պետք է փոխվեն»,- ասաց Ռուբեն Հակոբյանը:
Անդրադառնալով «Հանրապետական» խմբակցության ղեկավար Գալուստ Սահակյանի դիտարկմանը, թե ծաղր է, որ ընտրություններից հետո երկու ամիս ասում են՝ «ես նախագահ եմ», հետո էլ՝ «ես նախարար եմ»՝ ասաց, որ ողբերգություն է, որ ժողովրդին հասցրել են այն վիճակին, որ ժողովուրդն իր քվեով չի կարող իշխանություն ձևավորել, այն, ինչ կատարվել է իշխանությունների կողմից այս քսան տարիների ընթացքում ազգային շահի անտեսում է: « Ողբերգություն է, պետք է հասկանալ, թե ինչ ողբերգություն են ստեղծել ժողովրդի համար իշխանությունները»,- ասաց Ռուբեն Հակոբյանը:
