Կառավարությունը նախօրեին որոշում ընդունեց ՓՄՁ-ի սպառած էլէլտրաէներգիան 250 կվ/ժ-ի չափով սուբսիդավորելու վերաբերյալ։ Իսկ մինչ այդ այս ոլորտի ներկայացուցիչներից ահազանգել էին, որ ՀԷՑ-ի աշխատակիցներին առաջարկվել է ստորագրել մի պայմանագրի տակ, որով պարտավորվում են աշխատել բարձրացված սակագնով։
Այս պայմանագիրը դեռ զանգվածային բնույթ չի կրել, ամեն դեպքում մեր հարցումների ժամանակ մեզ հետ զրուցած ՓՄՁ ներկայացուցիչներն ասացին, որ դեռևս նման փաստաթուղթ չի առաջարկվել, սակայն դա դեռ չի նշանակում, որ խնդիրը լուծվել է։ Ընդամենը 250 կվ էլեկտրաէներգիայի սուբսիդավորումը չի կարող կանխել թանկացումները։ Այսինքն, այս ծանր բեռը կրկին մնալու է քաղաքացու ուսերին։ Կառավարությունն ասում է՝ միջոցներ չունի ամբողջությամբ սուբսիդավորելու, արտադրողն էլ ասում է, որ այդ դեպքում ստիպված է թանկացնելու արտադրանքը, իսկ քաղաքացին կենսական նշանակության ապրանքները բարձր գներով սպառելով՝ վճարում է չսուբսիդավորած բարձրացված սակագնի դիմաց։
«Առաջին լրատվական»-ի հետ զրույցում մի քանի սննդի կետերի ներկայացուցիչներ իրենց վրդովմունքը հայտնեցին կառավարության որոշման վերաբերյալ։
Գայանե Ղազարյանը հացաբուլկեղենի արտադրամասի մենեջեր է։ Ասում է՝ իրենք 60-70 հազար դրամի էլէկտրաէներգիա են սպառում, մինչդեռ կառավարությունը մոտ տասը հազար դրամի չափ սպառած էներգիան է սուբսիդավորելու։
«Մարդկանց վիճակը ահավոր է, իրենց սուբսիդավորումներին ես չեմ հավատում, նրանց որոշումներից և ոչ մեկը ժողովրդի օգտին չէ։ Ավելի լավ է ո՛չ թանկացնեն, ո՛չ էլ սուբսիդավորեն։ Հոսանքը թանկացավ, ամեն ինչն է թանկանալու, դա լուծում չէ, քանի որ թանկի դեպքում էլ կնվազի արտադրանքի սպառումը, ինչն էլ բերելու է արտադրամասի փակմանը»,-ասաց տիկին Գայանեն։
Կենտրոնի սննդի կետերից մեկի աշխատակիցը՝ տիկին Սեդան, մեզ հետ զրույցում իր զարմանքը հայտնեց Էներգետիկայի և բնական պաշարների նախարար Երվանդ Զախարյանի այն հայտարարության կապակցությամբ, թե իրենց հաշվարկներով ՓՄՁ-ն սպառում է 500 կվ/ժ-ի չափ էլեկտրաէներգիա, այնինչ՝ իրականում իրենք սպառում են ավելի քան 1000 կվ/ժ հոսանք։ «Եթե նրանք մեր սպառած հոսանքի ընդամենը 30 տոկոսն են սուբսիդավորելու, մենք էլ արդեն 20 տոկոսով ենք թանկացնելու։ Անգամ խանութի ապրանքն է թանկանալու, իսկ մենք արտադրում ենք, ինչը նշանակում է, որ թանկացումն անխուսափելի է»։
Մեր մյուս զրուցակիցը՝ Գագիկը, շաուրմայի բիզնեսով է զբաղված։ Մեզ հետ զրույցում ասաց, որ թանկացումը լուծում չէ, քանի որ այդ դեպքում սպառումն է նվազում, ինչն էլ, ինչպես շատերի դեպքում, հանգեցնելու է օբյեկտի փակվելուն։