Space.com-ի փոխանցմամբ՝ բրիտանացի հանրահայտ աստղաֆիզիկոս Սթիվեն Հոքինգը հայտարարել է, որ գտել է սև խոռոչների գոյության հետ կապված վաղեմի տեսական խնդրի լուծումը։ Էյնշտեյնի հարաբերական ընդհանուր տեսության համաձայն՝ սև խոռոչ ընկնող օբյեկտի մասին յուրաքանչյուր տեղեկատվություն մատնվում է կորստյան, ինչը, սակայն, հակասում է քվանտային մեխանիկայի օրենքներին, որոնց համաձայն տեղեկատվությունը ոչ մի տեղ էլ չի չքանում։
Հոքինգը, աշխատելով Քեմբրիջի ու Հարվարդի համալսարանները ներկայացնող իր գործընկերների հետ, եկել է այն եզրակացության, որ մատերիայի մասին քվանտա-մեխանիկական տեղեկատվությունը չի չքանում սև խոռոչի ներսում։ Նա հայտարարել է, որ այդ տեղեկատվությունը սև խոռոչի սահմանին՝ իրադարձությունների հորիզոնում, կոդավորվում է երկչափ հոլոգրամում։
Գիտնականի կարծիքով՝ ընկնող օբյեկտի մասին տեղեկատվությունը շարունակվում է պահպանվել այսպես կոչված գերկազմավորումներում։ Խոսքը ընկնող մասնիկների հոլոգրամի մասին է, որոնք պարունակում են ամբողջ տեղեկատվությունը, որը հակառակ դեպքում կարող էր կորստյան մատնվել։
