«Ժողովուրդ» թերթը գրում է. «Երեկ «Ժողովուրդ»-ի խմբագրություն էին ահազանգել Արմավիրի մարզի մի խումբ բնակիչներ և հայտնել, որ արդեն քանի օր է՝ մի խումբ ոստիկաններ զինված հսկում են Էջմիածին քաղաքի ճանապարհները:
Բնակիչները, որոնց անունները հարգելի պատճառով չենք հայտնում, պատմեցին, որ իրենց խիստ անհանգստացնում է, թե ինչու են ոստիկանները զինված հսկողություն իրականացնում. «Միգուցե ինչ-որ դեպք է տեղի ունեցել կամ պետք է տեղի ունենա, որ իրավապահները զինված են: Վախի մեջ ենք, ամեն օր մի վատ լուր ենք սպասում, թե հեսա մի բան կլինի: Ախր, ճիշտ հասկացեք՝ սա էլ դեռ քիչ չէ, զինված իրավապահները մարդկանց ճանապարհին տուգանում են՝ արագությունը գերազանցելու համար: Այդ ճանապարհին արագաչափ չկա, իրենք էլ այդ ամենից օգտվելով՝ տուգանում են: Ախր, գյուղացին ինչ է աշխատում, որ մի հատ էլ տուգանք վճարի»:
Բնակիչների պատմելով՝ մարզում լուրեր են շրջանառվում, որ «Արմավիրի» քրեակատարողական հիմնարկից դատապարտյալ է փախուստի դիմել, և այս օրերին իրավապահները փորձում են գտնել նրան. «Հիմա չգիտենք, թե որտեղից է փախուստի դիմել, գոնե մարդկանց տեղյակ պահեն, թե ինչ է կատարվում: Ճիշտ հասկացեք՝ Գյումրիում ապրող Ավետիսյան ընտանիքի անդամների սպանությունից հետո վախ կա սրտներումս. չգան, մտնեն մեր տները, օգնեք՝ հասկանանք, թե ինչու են զինված հսկում մարզը»:
Եվ այսպես, նախ փորձեցինք ՀՀ ԱՆ «Արմավիր» ՔԿՀ պետ Տիգրան Նավասարդյանից, պարզել, թե արդյո՞ք իր ղեկավարության տակ գտնվող ՔԿՀ-ից դատապարտյալ է փախուստի դիմել, սակայն վերջինս պատասխանեց, թե արձակուրդի մեջ է. «Բայց չեմ կարծում, որ դատապարտյալը ՔԿՀ-ից փախուստի դիմած լինի»: Մեզ հետ զրույցում ՀՀ ԱՆ ՔԿՎ լրատվական բաժնի պետ Գոռ Ղլեչյանն էլ հայտնեց, թե Արմավիրի ՔԿՀ-ն աշխատում է իր բնականոն հունով, և նման խնդիր չկա:
Ավելի ուշ մեզ տեղեկություններ հասան, որ ոմն Դ. Հարությունյանը, որ գողության համար ձերբակալված է եղել, ոստիկանության Արմավիրի մարզի բաժնից փախուստի է դիմել, և իրավապահներն այս օրերին փնտրել են նրան: Եվ, ահա, «Ժողովուրդ»-ին ոստիկանության հասարակայնության հետ կապերի և լրատվության վարչությունից հայտնեցին, որ գողության համար ձերբակալված Դ. Հարությունյանը օգոստոսի 23-ին՝ երեկոյան, հայտնաբերվել է:
Ասել է թե՝ վտանգը չեզոքացված է, և բնակիչները կարող են արդեն հանգիստ քնել»:
Ավելի մանրամասն՝ թերթի այսօրվա համարում:
