Hyetert-ի (Հայ թերթ) փոխանցմամբ, այսօր Պոլսո Հայոց պատրիարքի տեղապահ, արքեպիսկոպոս Արամ Աթեշյանը Սուրբ Զատկի կապակցությամբ պատգամ է հղել Թուրքիայում բնակվող հայերին: Ուշագրավն այն է, որ այս տարի համընկան Սուրբ Զատիկն ու Հայոց ցեղասպանության զոհերի հիշատակման օրը (ապրիլի 24-ին):
Չնայած դրան` Աթեշյանը Սուբ Զատիկի կապակցությամբ հղած իր պատգամում ոչ մի խոսք չի ասել ի հիշատակ Հայոց ցեղասպանության զոհերի:
Հիշեցնենք, որ ներկայումս Պոլսո հայոց պատրիարք Մեսրոպ արքեպիսկոպոս Մութաֆյանն անբուժելի հիվանդ է և չի կարողանում կատարել իր պարտականությունները: Դրա համար էլ հայկական համայնքը ցանկանում է նոր պատրիարք ընտրել, սակայն թուրքական իշխանություններն ընդդիմանում են դրան:
Փետրվարի սկզբներին Թուրքիայի բարձրագույն դատարանը մերժեց ընդունել հայկական համայնքի հայցը, որով վերջինս պահանջում էր թույլատրել նոր պատրիարքի ընտրությունների անցկացումը:
Այս ամենը խոսում է նրա մասին, որ Աթեշյանը ձեռնտու է թուրքական իշխանություններին: Չպետք է մոռանալ, որ երբ նախորդ տարվա աշնանը հայտնի դարձավ, որ թուրքական կողմը հրաժարվում է Աղթամարի Սուրբ խաչ եկեղեցու գմբեթին տեղադրել խաչը, աշխարհասփյուռ հայությունը սկսեց բոյկոտել Սուրբ խաչ եկեղեցում կատարվելիք պատարագը:
Նրանք նույնը պահանջում էին անել Աթեշյանից, սակայն վերջինս չանսաց նրանց և սեպտեմբերի 19-ին Աղթամարի եկեղեցում պատարագ կատարեց:
