Վրաստանի «Ազգային շարժման» գլխավոր քարտուղար Վանո Մերաբիշվիլին պատասխանել է վերաինտեգրման հարցերով պետական նախարար Պաատե Զաքարեիշվիլիին, ով երկրի նախագահ Միխեիլ Սաակաշվիլիին մեղադրել է Եվրոպական խարտիան վավերացնելու պատասխանատվությունը ստանձնելու մեջ։ Այս մասին հաղորդում է «Գրուզիա Օնլայն»-ը:
Մերաբիշվիլիի խոսքերով` Վրաստանն իրականում ստանձնել է այդ պատասխանատվությունը, որը նպաստում է երկրի ինտեգրմանը եվրոպական կառույցներին: Նա նշել է, որ Վրաստանն այսօր նույնպես պատրաստ է աջակցել տվյալ որոշմանը: Մերաբիշվիլին զարմանք է հայտնել այն կապակցությամբ, թե 1999 թ. ընդունված որոշումն ինչ կապ ունի Ախալքալաքի գործոնի հետ:
Նա նշել է, որ 1999 թ. ի վեր այս հարցը չի բարձրացվել, սակայն այսօր «Վրացական երազանք» կոալիցիայի նախաձեռնությամբ Ախալքալաքում շոշափում են այս թեման, ինչը վկայում է այն մասին, որ իշխանությունները որևէ պատկերացում չունեն Ջավախքում գործընթացների մասին:
Մերաբիշվիլիի խոսքերով` նորագույն պատմության մեջ երբեք Ախալքալաքում վրացական պետությունն այդքան ամուր չի եղել, ինչպես վերջին երեք տարիներին:
Նա հիշեցրել է, որ այդ տարածաշրջանում գործել են այնպիսի կազմակերպություններ, ինչպիսիք են «Վիրքը», «Ջավախքը», 2004-2005 թթ. Ախալքալաքի կենտրոնում տեղի են ունեցել բազմահազարանոց ցույցեր՝ տարբեր ծայրահեղական պահանջներով, իսկ ամենածայրահեղականը եղել է Վահագն Չախալյանը:
«Հիշեցնեմ, որ Աշխալքալաքում գազ է քաշվել, որն այնտեղ երբեք չի եղել, կառուցվել է բարձր որակի աբտոմայրուղի, որը Թբիլիսին կապել է Ախալքալաքի հետ»,- ասել է Մերաբիշվիլին:
Ազգային շարժման գլխավոր քատուղարը իշխանություններին կոչ է արել հատկացնել ազդեցիկ մարդկանց խումբ, որը կստանձնի այս հարցերի պատասխանատվությունը: Նա ասել է, որ ինքը պատրաստ է համագործակցել այդ խմբի հետ:
Հիշեցնենք, որ մարտի 14-ին Ախալքալաքի քաղաքային ժողովի նիստի ժամանակ «Վրացական երազանք` հանրապետականներ» խմբավորումը հանդես է եկել հայերենին տարածաշրջանային լեզվի կարգավիճակ շնորհելու նախաձեռնությամբ: Այս նպատակով նրանք դիմել են Վրաստանի խորհրդարանին` խնդրելով վավերացնել լեզուների Եվրոպական խարտիան:
