«Առաջին լրատվական»-ի տեղեկություններով՝ «Բարգավաճ Հայաստան» կուսակցության ղեկավար Գագիկ Ծառուկյանը կուսակցական նեղ շրջանակում ասել է, որ Երևանի ավագանու ընտրություններին ինչքան գումար պետք է, կծախսեն: Ի տարբերություն նախագահական ընտրությունների, այս ընտրություններին ԲՀԿ-ն մասնակցում է և կարծես վճռական է տրամադրված, որ պետք է կամ հաղթի, կամ էլ Երևանի ավագանու կազմում ավելի մեծ խմբակցություն ունենա: Մեր աղբյուրների փոխանցմամբ՝ նա ասել է, որ եթե Հանրապետական կուսակցությունը յուրաքանչյուր ընտրողի տա 10.000 դրամ ընտրակաշառք, իրենք կտան 20.000: Եթե ՀՀԿ-ն տա 20.000 դրամ, իրենք կտան 30.000: «Եթե պետք լինի, գլուխը 100 մանեթ կծախսենք»,- հայտարարել է Գ. Ծառուկյանը: Այսինքն՝ յուրաքանչյուր ընտրողի հաշվով 100 դոլար կծախսեն:
Հիշեցնենք, որ նույն հաշվարկը ԲՀԿ-ն արել էր նաև խորհրդարանական վերջին ընտրություններից առաջ: Անցած տարի այս օրերին նույնպես մամուլում հրապարակումներ էին շրջանառվում, թե ԲՀԿ-ն հաշվարկել է Հայաստանի յուրաքանչյուր ընտրողի հաշվով 100 դոլար ծախսել: Արդյունքում՝ ԲՀԿ շնորհիվ ընտրակաշառքը 10.000 դրամից բարձրացավ: Ըստ որոշ տեղեկությունների՝ շատ համայնքներում ՀՀԿ-ի բաժանած 10.000-ական դրամ կաշառքից հետո ԲՀԿ-ն բաժանել էր 20.000-ական դրամ, ինչի շնորհիվ էլ ԲՀԿ-ն այդ համայնքներում հաղթել էր:
