«Սաակաշվիլին հետևողականորեն շարունակում է իր քաղաքականությունը՝ ուղղված Կովկասում, այդ թվում՝ նաև Հայաստանում, Ռուսաստանի դերի թուլացմանը»,- անդրադառնալով Սաակաշվիլիի՝ արտերկրում գտնվող ռուսական ռազմակայաններ անձնակազմի և ռազմական բեռների փոխադրումը Վրաստանի տարածքով արգելելու որոշմանը՝ «Առաջին լրատվական»-ի հետ զրույցում կարծիք հայտնեց Ռազմավարական մշակույթի ռուսական հիմնադրամի փոխնախագահ Անդրեյ Արեշևը:
Արեշևի խոսքերով, նորություն չէ, որ Վրաստանի իշխանությունը օգտագործում է իր կոմունիկացիոն դիրքը հայ-ռուսական ռազմական համագործակցությունը դժվարացնելու համար. «Սակայն համեմատաբար նոր է Հայաստանին վրացական տարածաշրջանային ծրագրերի մեջ ներքաշումը, և հնարավոր է՝ հենց դրա հետ է կապված Վրաստանի պաշտպանության նախարարի այցը Երևան:
Բայց Վրաստանը ինքնուրույն արտաքին քաղաքական խաղացող չի համարվում, ավելի շուտ՝ որոշակի ուժեր Վրաստանի միջոցով Հայաստանին են հասցնում Ռուսաստանի հետ Հայաստանի համագործակցության անցանկալիության մասին մեսիջները»:
Արեշևի կարծիքով, այդ մեսիջները կարող են սահմանափակ ազդեցություն ունենալ հայ-ռուսական ռազմական համագործակցության վրա, քանզի այն պայմանավորված է ոչ թե Երևանի կամ Մոսկվայի քմահաճություններով, այլ ստեղծված օբյեկտիվ իրավիճակով: Ըստ քաղաքագետի, չնայած Վրաստանի ստեղծած խոչընդոտներին, երկու երկրները կգտնեն էֆեկտիվ միջոցներ ռազմական համագործակցության հետագա առաջընթացի համար:
Արեշևի խոսքերով, ստեղծված հարցի շուրջ ռուս-վրացական բանակցությունները դժվար հավանական են, և Ռուսաստանը բավականաչափ այլ լծակների է տիրապետում, որպեսզի իրականացնի Հայաստանի հանդեպ իր ունեցած ռազմական պարտավորությունները:
