«Ամեն մեկն ազատ է իր մոտեցումը բանեցնելու: Ես ներկա կլինեմ բաց խորհրդի բոլոր նիստերին, պատրաստ եմ լսել բոլոր առաջարկները, զեկույցները, իսկ 10-րդ նիստից հետո կկարողանամ գնահատել»,- Ազատության հրապարակում հրավիրված մամլո ասուլիսի ժամանակ հայտարարեց նախագահի նախկին թեկնածու, հացադուլ հայտարարած Րաֆֆի Հովհաննիսյանը՝ անդրադառնալով Նիկոլ Փաշինյանի առաջարկած ստվերային կառավարության ստեղծմանը:
«Ժառանգության» առաջնորդը նաև հավելեց, որ դա ոչ թե ստվերային, այլ լուսավոր կառավարություն է:
Անդրադառնալով հարցին, թե ավելի նպատակահարմար չէ՞ր լինի, եթե ընդդիմադիր ուժերը համախմբվեին և Երևանի ավագանու ընտրություններին գնային միասնական ցուցակով, Ր. Հովհաննիսյանն ասաց. «Մենք փորձել ենք ավելի մեծ դաշինք կազմել, ամենատարբեր պատճառներով դա չի ստացվել, իսկ մեր ցուցակը կներկայացվի ուրբաթ օրվա հանրահավաքին: Այն կազմված կլինի տարբեր քաղաքացիական շերտերից և մարդկանցից: Այն ուժերը, որոնք նախկինում գտնում էին, որ ընտրություններին չպետք է մասնակցեն, հիմա վերանայել են իրենց մոտեցումը և մասնակցում են, մենք ևս կմասնակցենք, և մեր մասնակցությունը կլինի որոշիչ»,- վստահեցրեց նա:
Րաֆֆի Հովհաննիսյանը նշեց, որ քաղաքացիական խորհրդի բոլոր նիստերին մասնակցելու է, սակայն իր կարծիքը կհայտնի միայն տասներորդ նիստից հետո:
Լուսանկարը՝ PanARMENIAN Photo-ի
