Google-ը, Facebook-ը և Twitter-ը միացել են բրիտանական Internet Watch Foundation (IWF) բարեգործական կազմակերպության նախաձեռնությանը՝ դիմակայելու համացանցում մանկական պոռնոյի տարածմանը: Այս մասին ասվում է բարեգործական կազմակերպության կայքում:
IWF-ի մեջ մտնող տեխնոլոգիական ընկերությունները կզբաղվեն տվյալների բազայի ստեղծմամբ և տարածմամբ, որի օգնությամբ համացանցային փրովայդերները, սոցիալական մեդիան, տվյալների մշակման և պահպանման կենտրոնները կարող են արագ ճանաչել և հեռացնել անօրինական կոնտենտը ամբողջ աշխարհի ռեսուրսներից՝ ասվում է պաշտոնական հաղորդագրությունում: Տվյալների բազան բաղկացած կլինի «հեշերից»՝ երեխաների կերպարները շահագործող յուրաքանչյուր ապօրինի լուսանկարի և տեսակոնտենտի յուրօրինակ թվային մատնահետքերից:
«Դա նշանակում է, որ սեքսուալ բռնությունների զոհերի լուսանկարները կհայտնաբերվեն և կհեռացվեն առավել օպերատիվ կերպով, իսկ այն լուսանկարները, որոնց գոյության մասին մեզ հայտնի է, չեն ներբեռնվի համացանց»,- ասվում է հաղորդագրությունում:
