Ամերիկացի սենատորները դիտարկում են ավելացնել մուտքի արտոնագրի համար գանձվող գումարն ընկերություններից, որոնք վարձում են բարձր որակավորում ունեցող ներգաղթյալների` միգրացիայի ոլորտում նոր օրինագծի շրջանակներում բյուջեի ծախսերը փակելու համար։ Այս մասին հաղորդում է The Wall Street Journal-ը:
Օրինագիծը, որը սենատորները կքննարկեն ապրիլին, նախատեսում է ուժեղացնել անվտանգության միջոցառումներն ԱՄՆ-ի սահմանների վրա: Դեռևս հայտնի չէ, թե նոր օրենքն ինչքան կարժենա ԱՄՆ բյուջեի համար, սակայն 2007 թ. համանման օրինագիծը նախատեսել է 18 միլիարդ դոլարի ծախս՝ տասը տարվա ընթացքում:
Ինչպես նշում է WSJ-ը, նախատեսվում է բյուջեի ծախսերի փոխհատուցում երկու ուղիով: Առաջինը նախատեսում է բարձրացնել մուտքի արտոնագրի համար գանձվող գումարն ընկերություններից, որոնք վարձում են որակավորված արտասահմանցիների: Խոսքը մասնավորապես H-1B տեսակի մուտքի արտոնագրի մասին է, որի արժեքն այսօր կազմում է 1500-5500 դոլար:
Երկրորդ տարբերակն առաջարկում է տուգանել անօրինական ներգաղթյալներին, որոնք ցանկանում են ստանալ ԱՄՆ քաղաքացիություն:
