Ոչ իրական ընդդիմությունն ամեն ինչ անելու է, որ գալիք ընտրություններին ուժերը մաս-մաս գնան, քաղաքական խնդիրներ չձևավորվեն: «Առաջին լրատվական»-ի հետ զրույցում ասաց «Քրիստոնեա-ժողովրդավարական վերածնունդ» կուսակցության նախագահ Սոս Գիմիշյանը՝ անդրադառնալով գալիք ավագանու ընտրություններին:
Նա տեղեկացրեց, որ իր ղեկավարած կուսակցությունը նախնական որոշում ունի, վերջնական չէ, գուցե ինչ-որ փոփոխություններ լինեն, ելնելով իրավիճակից: Բայց, ըստ Գիմիշյանի, այն, ինչ այսօր ձևավորվում է՝ բազմաթիվ քաղաքական ուժեր առանձին են գնում Երևանի ավագանու ընտրություններին, իրենց չի գոհացնում, չի գոհացնում նաև այն պատճառով, որ քաղաքական պայքարը վերածվում է մանդատների պայքարի, որն ի սկզբանե, իրենց կարծիքով, դատապարտված է ընդդիմության պարտությանը: «Այդ իսկ պատճառով մեր դիրքորոշումը հետևյալն է, որ չենք մասնակցելու ընտրություններին»,- ասաց Սոս Գիմիշյանը: Վերջինիս խոսքով՝ ընդդիմության միասնական շտաբը, եթե նման բան ձևավորվի, պարտության ուղիղ ճանապարհն է:
«Միասնական շտաբ խորհրդարանական ընտրությունների ժամանակ ձևավորվեց, և մենք տեսանք, թե ինչ եղավ, որովհետև ԲՀԿ-ն ընդդիմություն չէ, ես ընդհանրապես չեմ հասկանում, թե ինչպես կարող են «Ժառանգությունն» ու այլ ընդդիմադիր ուժերը համագործակցել ԲՀԿ-ի հետ: Դա իշխանության կողմից մշակված ծրագրերի իրականացման ուղիղ ճանապարհ է: Դրա մասնավոր մի դեպքն էլ այն է, որ առանձին-առանձին են գնում գալիք ընտրություններին բոլոր ուժերը: Մենք կողմնակից էինք իրական ընդդիմադիր ուժերի լայն կոալիցիային և խնդիրների քաղաքական ձևակերպմանը, համախմբման միջոցով նոր իրավիճակ ստեղծելուն, ալիք բարձրացնելուն, հասարակության մեջ վստահություն և ոգևորություն առաջացնելուն: Մեծ վտանգը, որը սպառնում է այս երկրին և այս պայքարին հետևյալն է. ինչպես Լևոն Տեր-Պետրոսյանի պայքարը վերածվեց տաս զոհի և յոթ մանդատի, այս պայքարն էլ չվերածվի նման բանի, անարդյունք չմնա»,- ասաց Սոս Գիմիշյանը:
