Վրաստանի նախագահ Միխեիլ Սաակաշվիլին դիմել է երկրի խորհրդարանին` առաջարկելով չեղյալ հայտարարել 2006 թվականին Ռուսաստանի հետ կնքված համաձայնագիրը, որով կարգավորվում էր արտերկրում գտնվող ռուսական ռազմակայանների անձնակազմի և ռազմական բեռների փոխադրումը:
Քաղաքագետ Ռուբեն Մեհրաբյանի խոսքերով, այստեղ պետք է ընդգծել մի հանգամանք, որ ռուսական ռազմական տրանզիտը դեպի Հայաստան փակելու մասին հայտարարությունը Սաակաշվիլին անում է այն ժամանակ, երբ Հայաստանում էր գտնվում Վրաստանի պաշտպանության նախարարը: Մեհրաբյանը նաև ընդգծեց, որ Սաակաշվիլին նման հայտարարություն է անում այն դեպքում, երբ Հայաստանում գտնվող Վրաստանի պաշտպանության նախարարը այն հարցին, թե չի՞ խանգարում Հայաստանի անդամակցությունը ՀԱՊԿ-ին և Վրաստանի ձգտումը դեպի ՆԱՏՕ` համատեղ ռազմական համագործակցության ծրագրերի իրականացմանը, պատասխանել է, որ ոչինչ չի կարող խանգարել, քանզի դա բխում է իրենց շահերից:
«Ավելին, Վրաստանն առաջարկում է հայկական բանակի մարտական պատրաստության հետ կապված բոլոր խնդիրներով համագործակցել, Վրաստանի ուսումնամարզական կենտրոնները օգտագործելու առաջարկ է արել: Այդ օրը վաղ թե ուշ գալու էր, և մարդիկ, ովքեր կարճաժամկետ խնդիր լուծելու համար ստորագրում էին Ռուսաստանի հետ անիմաստ, մինչև դարիս կեսը ձգվող պայմանագրեր, որոնց կատարման որևէ երաշխիք չկա, իսկ չկատարելու համար կան բազմաթիվ պատճառներ, այսօր մտածելու շատ բան ունեն»,- նկատեց Մեհրաբյանը:
Քաղաքագետի խոսքերով, այս ամենը լրջագույն ճնշում է տարածաշրջանում ռուսական ազդեցության վրա և կարող է լուրջ գործոն հանդիսանալ տարածաշրջանում ուժերի և ազդեցությունների հավասարակշռության փոփոխության համար:
Մեհրաբյանը այս ամենի հետ փոխկապակցեց նաև տարածաշրջանային այցից հետո Մինսկի խմբի համանախագահների արած հայտարարությունը և նրանց սպասվող հանդիպումը ԱՄՆ պետքարտուղար Հիլարի Քլինթոնի հետ:
