«Ժառանգություն» կուսակցության առաջնորդ, նախագահական ընտրություններում ըստ պաշտոնական տվյալների երկրորդ տեղը զբաղեցրած «Ժառանգություն» կուսակցության հանրահավաքներից հետո զարգացումներ են սկսվել նաև Ղարաբաղում: Ղարաբաղի ընդդիմության հետաքրքրվածությունը հայաստանյան ներքաղաքական իրողություններով անհանգստացրել է Ղարաբաղի իշխանություններին, որոնք տարբեր մակարդակներով անդրադարձել են, քննադատել «Սահմանադրական Արցախ» շարժման ներկայացուցիչ, ԼՂՀ խորհրդարանի պատգամավոր Վահան Բաբասյանին, ով շաբաթներ առաջ Երևանի Ազատության հրապարակում ելույթ էր ունեցել՝ ի պաշտպանություն իր ընտրական իրավունքը պահանջող ժողովրդի:
«Առաջին լրատվական»-ի հետ զրույցում Վահան Բադասյանն ասաց, թե ինչ է իրականում տեղի ունեցել և ինչու: Նա հիշեցրեց, որ Երևանում Րաֆֆի Հովհաննիսյանի կազմակերպած հանրահավաքներից մեկի ժամանակ միացել են ժողովրդին, փորձել կոտրել այն կարծրատիպը, թե արցախցին միշտ ՀՀ իշխանության կողքին է, նույնիսկ ապօրինությունների դեպքում:
«Իրականությունն այն է, որ ինչպես ՀՀ վարչախումբն է Հայաստանում ճնշում, կամայականորեն տնօրինում ժողովրդի սեփականությունը, այնպես էլ Արցախում է բևեռացած վիճակ՝ նույնիսկ ավելի շատ, քան Հայաստանում: Այս իշխանությունները սպառել են իրենց և պետք է ազնվություն ունենան՝ ընտրություններով սահուն կերպով հեռանալու»,- ասաց Վահան Բադասյանը՝ հավելելով, որ իր այս դիրքորոշումը, իր հայտարարությունները ճնշելու նպատակով Արցախում մի շարք քայլեր են ձեռնարկվել:
Վերջինս տեղեկացրեց, որ օրերս Ազատամարտի միության շրջանային կառույցի ղեկավարությունը՝ Վալերի Գևորգյանի, Իվան Ավանեսյանի ղեկավարությամբ, կրթության բաժնի վարիչ Էդուարդ Պետրոսյանը և ուրիշներ հավաք են կազմակերպել Ղարաբաղյան պատերազմի վետերանների հետ իր ծննդավայրում՝ Հադրութ քաղաքում, և քննադատել Երևանի Ազատության հրապարակում կայացած հանրահավաքի ժամանակ իր հայտարարությունները:
«Նրանցից ոմանք այն մարդիկ են, որոնք իրենց տեղը, տաքուկ անկյունը գտել են և ցանկանում են, որ այսպես շարունակվի: Բայց այն զանգվածը, ում նրանք հավաքել են, ոչ տեղյակ են, ոչ էլ կարող են այդ կերպ ապրել, և բոլորն այդ հավաքից վրդովված են դուրս եկել: Այդ հավաքը նպատակ է ունեցել ճնշում գործադրել իմ վրա, որպեսզի ես չշարունակեմ իմ ընդդիմադիր կեցվածքը, որպեսզի զերծ մնամ այդպիսի գործընթացներից: Փոխվարչապետի կողմից նույնաբովանդակ ճնշում էր եղել նաև Արթուր Աղաբեկյանի վրա»,- ասաց նա:
Ըստ Վահան Բադասյանի՝ ճնշումներ են եղել նաև Մարտունիում, որտեղ ամռանը կայացած նախագահական ընտրություններում Վիտալի Բալասանյանը հաղթել էր. «Այնտեղ հանդիպում ունեինք ժողովրդի հետ, փողոցներում, անկյուններում պատասխանատու բոլոր աշխատողները պահակ էին կանգնել, որպեսզի մարդկանց ընդգրկեն «սև ցուցակի» մեջ՝ հետագայում ճնշելու նպատակով»:
Սակայն Բադասյանի պնդմամբ՝ «Սահմանադրական Արցախ»-ը չի ընկճվում ճնշումներից, շարունակելու է լինել ժողովրդի կողքին՝ ժողովրդի հետ երկխոսելով: «Մեր գործունեությունն առաջիկայում տեսանելի կլինի, մենք պետք է խոսենք ժողովրդի հետ»,- ավարտեց իր խոսքը Վահան Բադասյանը:
