Ապրիլի 19-ին, Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց հայ-ռուսական միջտարածաշրջանային առաջին համաժողովի առիթով Հայաստան ժամանած ՌԴ նախագահի աշխատակազմի ղեկավար Սերգեյ Նարիշկինի գլխավորած պատվիրակությանը: Պատվիրակությանն ուղեկցում էին ՀՀ նախագահի աշխատակազմի ղեկավար Կարեն Կարապետյանը, երկու երկրների դեսպանները:
Նորին Սրբությունը տիար Նարիշկինի և ՌԴ պատվիրակության այցը Մայր Աթոռ նկատեց իբրև արտահայտություն երկու ժողովուրդների միջև առկա դարավոր եղբայրության ու ջերմ բարեկամության: Վեհափառ Հայրապետը նաև ողջունեց հայ-ռուսական միջտարածաշրջանային առաջին համաժողովի անցկացումը` գոհունակությամբ նշելով, որ այն ավելի ընդգրկուն է դարձնում երկու պետությունների համագործակցությունը:
Իր խոսքում Սերգեյ Նարիշկինն ուրախություն հայտնեց հայոց հոգևոր կենտրոն այցի առիթով: ՌԴ նախագահի աշխատակազմի ղեկավարն անդրադարձավ Ռուսաստանի և Հայաստանի պատմական կապերին և փոխադարձ զորակցությանը դժվարին պահերին: Երկու ժողովուրդների բարեկամության ամրապնդման գործում նա ընդգծեց Հայ Առաքելական Եկեղեցու և նրա Հովվապետերի կարևոր դերակատարությունն ու առաքելությունը:
Հանդիպման ընթացքում Նորին Սրբությունը նաև ի դեմս ՌԴ նախագահի աշխատակազմի ղեկավարի երախտագիտություն հայտնեց Ռուսաստանի իշխանություններին Լեռնային Ղարաբաղի հակամարտության խաղաղ կարգավորմանն ուղղված իրենց ջանքերի, ինչպես նաև Ռուսաստանի հայ համայնքի նկատմամբ մշտապես դրսևորվող հոգատար վերաբերմունքի համար: Վերջում Վեհափառը, Հայրապետական իր օրհնությունը բերելով տիար Նարիշկինի գլխավորած պատվիրակությանը, մաղթեց, որ Աստված անխախտ, զորեղ ու առաջընթացի մեջ պահի ու պահպանի երկու ժողովուրդների բարեկամությունը:
