Վրաստանի վարչապետ Բիձինա Իվանիշվիլին հինգշաբթի օրը 7 էջանոց նամակով պատասխանել է Եվրոպական ժողովրդական կուսակցության քննադատական նամակին, որը ստորագրել էին Եվրախորհրդարանի 23 պատգամավորներ:
Նամակում Վրաստանի վարչապետը գրել է, որ նոր կառավարությունը մտադիր չէ «ցուցադրական ժողովրդավարություն» խաղալ, այլ պատրաստվում է նորմալ պետություն ստեղծել:
«Վրաց հասարակությունում, որը շնորհակալ է Արևմուտքին օգնության և աջակցության համար, հարցեր կան ուղղված այն քաղաքական ուժերի ներկայացուցիչներին, ովքեր ողջունում են բռնության, արժանապատվության ոտնահարման և ստորացման վրա հիմնված ցուցադրական ժողովրդավարությունը և այսօր քննադատում են Վրաստանի նոր կառավարությանը, որը կանգնած է իրական ժողովրդավարական պետության ստեղծման ուղու վրա»,-գրում է Իվանիշվիլին:
Նրա կարծիքով՝ եվրոպական արժեքները նշանակում են անձնական ազատություն, ուրիշի արժանապատվության նկատմամբ հարգանք, պետական կառավարմանը մասնակցություն, կառավարության պատասխանատվություն, օրենքի գերակայություն, մարդու իրավունքներ և փոքրամասնության շահերի պաշտպանություն, որոնց պատճառով էլ վրաց ժողովուրդը ձգտում է դեպի Արևմուտք:
Իվանիշվիլին նշել է, որ հարգում է Եվրոպական ժողովրդական կուսակցությանը՝ որպես Եվրոպայի ամենամեծ, ամենաազդեցիկ և հաջողակ քաղաքական ուժի, և կոչ է անում նրան ուշադրություն դարձնել այն փաստերի վրա, որոնք, հնարավոր է, շատերին հայտնի չեն եղել:
