Ռուսական «Կոմերսանտ» թերթի փոխանցմամբ՝ Անկարայում ավարտվել է Ղրիմի թաթարների համաշխարհային կոնգրեսը, որի մասնակիցները խստորեն քննադատել են Ռուսաստանին՝ Ղրիմի թաթարների հիմնարար իրավունքներն ու ազատություններն անտեսելու համար։
12 երկրներում բնակվող Ղրիմի թաթարների համայնքների ներկայացուցիչների երկօրյա գագաթնաժողովի արդյունքներով ընդունվել է դիմում՝ ուղղված ՄԱԿ-ին ու միջազգային հանրությանը, որով կոչ են արել Ղրիմի խանության վերացումից հետո Ղրիմի թաթարների նկատմամբ Ռուսաստանի իրականացրած գործողությունները ճանաչել որպես ցեղասպանություն։
Դատապարտելով 2014 թվականի մարտին Ղրիմի բռնակցումը՝ հետազոտության հեղինակները Մոսկվային մեղադրել են Ղրիմի թաթարների հիմնարար ազատություններն անտեսելու մեջ։ Համագումարի կազմակերպիչներն են Ուկրաինայի նախագահի՝ Ղրիմի թաթարների իրավունքների հարցերով լիազոր ներկայացուցիչ Մուսթաֆա Ջեմիլևն ու Ղրիմի թաթարների մեջլիսի նախագահ Ռեֆաթ Չուբարովը։ Վերջինս ընտրվել է կոնգրեսի նախագահ։
Ավելի վաղ Մուսթաֆա Ջեմիլևին արգելել են մուտք գործել Ղրիմ՝ ազգամիջյան հակամարտության բորբոքմանն ուղղված գործունեության համար։
Համագումարի մասնակիցներին հասցեագրված Ուկրաինայի նախագահ Պյոտր Պորոշենկոյի ուղերձում նշվել է, որ Ուկրաինան պատրաստ է Ղրիմին տալ ազգային-տարածքային ինքնավարության կարգավիճակ։ Համագումարի մասնակիցներին դիմել է նաև Թուրքիայի նախագահ Ռեջեփ Էրդողանը, ով հայտարարել է, որ Թուրքիան չի ճանաչում ու չի ճանաչելու Ղրիմի միացումը Ռուսաստանին։
Ռուսաստանի քաղաքականությանն աջակցող Ղրիմի թաթարների ներկայացուցիչները քննադատել են Անկարայում տվյալ համագումարի կազմակերպիչներին։ Բացի այդ, Ղրիմի թաթարների ներկայացուցիչները Մոսկվայում օգոստոսի 1-ին բողոքի ակցիա են անցկացրել Թուրքիայի դեսպանատան շենքի առջև։
Հիշեցնենք. մեկ ամիս առաջ հաղորդվել էր, որ թուրք գործարարները, որոնք այցելել են Ղրիմ, մտադիր են Ղրիմի տարածքում ներդնել 12.5 միլիարդ դոլար: Ներդրումային առաջին նախագիծը կլինի Սիմֆերոպոլում 5-աստղանի հյուրանոցի կառուցումը: Այդ մասին հայտարարել է Թուրքիայի Քայսերի քաղաքի արդյունաբերական կենտրոնի փոխնախագահ Սուլեյման Սարփթաշը:
Սարփթաշի խոսքով՝ Թուրքիայի կառավարության լիազոր անձինք հավանության են արժանացրել իրենց գործողությունները՝ հայտարարելով, որ պատժամիջոցներն ամեն դեպքում ինչ-որ ժամանակ կվերացվեն: Սարփթաշը հիշեցրել էր, որ Թուրքիայի կառավարությունը չի միացել Ռուսաստանի դեմ պատժամիջոցներին և իրենց չի արգելել գործունեություն ծավալել Ղրիմում: