Փորձագետ Անուշ Սեդրակյանի կարծիքով՝ ո՛չ Ռուսաստանը և ո՛չ էլ Ադրբեջանը հետաքրքրված չեն Ադրբեջանի՝ Եվրասիական տնտեսական միության կազմում ընդգրկվելու հեռանկարով: Նա «Առաջին լրատվական»-ի հետ զրույցում կարծիք հայտնեց, որ այդ կապակցությամբ առաջացած հայտարարությունների ողջ խնդիրը «Ադրբեջանի խաղալն է Ռուսաստանի, իբրև թե վերածնվող, բայց իրականում տապալվող կայսրության շահերով և քաղաքական նկատառումներով»:
Մանրամասնելով իր միտքը՝ Անուշ Սեդրակյանն ասաց. «Ադրբեջանը նույնպես էներգակիր երկիր է, և այստեղ խնդիր կա, թե որտեղ կուղղորդվեն այդ էներգակիրները: Եթե դրանք Թուրքմենստանի էներգակիրների պես ուղղորդվեն դեպի Եվրոպա, ապա Ռուսաստանը հերթական հարվածը կստանա նախևառաջ իր տնտեսական շուկային և ռազմական անվտանգությանը»:
«Ինչո՞ւ երկրի քաղաքականությունը արմատապես չի կարող փոխվել,- հարց ուղղեց Անուշ Սեդրակյանը, ապա շարունակելով ասաց,- որովհետև չեն փոխվում հարևանները, նրա շահերը, և չի փոխվում այն հումքատնտեսական բազան, որին այդ երկիրը տիրապետում է»:
Նրա խոսքերով՝ փոքր երկիր լինելու մեջ կա մի մեծ առավելություն՝ ավելի ճկուն է ու ավելի արագ կարող է ադապտացվել հանգամանքներին. «Մենք պետք է կարողանանք այս պարագայում ճիշտ գեոպոլիտիկ որոշում ընդունել և կարողնանալ կողմնորոշվել:
Թե՛ Ռուսաստանի, թե՛ Ադրբեջանի համար կարևոր չէ Ադրբեջանի՝ ԵՏՄ անդամագրվելու հանգամանքը, կարևորը տնտեսաքաղաքական այն թաքուն առևտուրն է, որ Ռուսաստանն ու Ադրբեջանը վարում են: Ռուսաստանի կողմից զենքի վաճառքը փաստում է, որ որոշակի պայմանավորվածություններ արդեն ձեռք են բերվել»:
Մեր այն դիտարկմանը, թե հնարավո՞ր է Եվրոպական խաղերի ավարտից հետո հայ-ադրբեջանական սահմանին իրավիճակը կրկին լարվի, եթե ոչ լայնամասշտաբ պատերազմ, ապա նախորդ տարվա հուլիս-օգոստոս ամիսների միջադեպերի կրկնություն, փորձագետն արձագանքեց․«Միջադեպերը միշտ լինելու են: Այն միջադեպերն էլ Պուտինը հրահրեց, որպեսզի հետո հանդես գա որպես խաղաղարար, բայց բարեբախտաբար մեր բանակը կարողացավ ըստ արժանվույն պատասխանել: Մի մեծ խրախուսական բան կա ՝« Ռոսիի նե դո էտոգո», և դա ինձ հույս է ներշնչում, որ մեր սահմանը, որոշ ժամանակ դեռ հանգիստ կլինի»:
Հարցազրույցն ամբողջությամբ՝ մեր տեսանյութում:
