«Երևանյան ամառ 2015»-ի հերթական մեծ միջոցառումը՝ Ձմերուկի երրորդ երևանյան փառատոնը կայացավ Կարապի լճում։ Փառատոնն այս տարի էլ անցել է հազարավոր երևանցիների ու մայրաքաղաքի հյուրերի աշխույժ մասնակցությամբ։ Փառատոնի համերգային ծրագրին մասնակցել են սիրված երգիչ-երգչուհիներ, DJ-ներ, ովքեր մինչ երգելը ճանաչված հաղորդավարների ու դերասանների հետ միասին փառատոնի այցելուներին իրենց ձեռքով կտրած ձմերուկ են հյուրասիրել։
Առանձին տաղավարներով էին ներկայացված Երևանի բոլոր վարչական շրջանները՝ մշակույթի տների, արհեստագործական ուսումնական հաստատոությունների սաների կարվինգի աշխատանքներով, ֆուրշետի կազմակերպման ընկերություններ, որոնք ներկայացրել են տոնական սեղանները ձևավորելու համար ձմերուկից պատրաստվող լավագույն օրինակները։
Մարդաշատ էին նաև փառատոնի մրցույթ-խաղերը, որոնց հաղթողները Երևանի քաղաքապետարանի կողմից պարգևատրվել են թանկարժեք նվերներով՝ անհրաժեշտ պարագաներով մարզական պայուսակներ, հանգստյան ուղեգրերով և այլն։
Փառատոնին այցելել է նաև Երևանի քաղաքապետ Տարոն Մարգարյանը, հետևել է միջոցառման ընթացքին ու զրուցել փառատոնին մասնակից քաղաքացիների հետ։
Նշենք, որ Կարապի լճում «Երևանյան ամառ 2015»-ի հաջորդ միջոցառումը «Երևանյան կինոերեկո»-ն է՝ Ոսկե ծիրան միջազգային 12-րդ կինոփառատոնի ընտրված ֆիլմերի բացօթյա ցուցադրությունով։ Իսկ մինչ այդ «Երևանյան ամառ 2015»-ի մի շարք այլ՝ մշակութային ու մարզական միջոցառումներ են անցկացվելու Երևանի տարբեր հատվածներում։
