Չինաստանի կառավարությունը «կնպաստի Վրաստանում թեյի աճեցման վերածնունդին և զարգացմանը»: TASS-ի տեղեկացմամբ՝ այս մասին Վրաստանի մայրաքաղաքում հայտնել է Վրաստանի գյուղատնտեսության նախարար Օթարի Դանելիան՝ ամփոփելով հուլիսի 14-17-ին Չինաստան այցի արդյունքները:
Նրա խոսքով՝ այդ երկրի գյուղատնտեսության նախարար Հան Չանֆուի և գերատեսչությունների ու ընկերությունների ներկայացուցիչների հետ հանդիպման ժամանակ «քննարկվել են գյուղատնտեսության ոլորտում երկու երկրների համագործակցության ընդլայնման հարցերը»: «Խորհրդանշական է, որ թեյի աճեցման մշակույթը Վրաստան է եկել XIX դարի կեսին հենց Չինաստանից, հիմա հենց այդ երկիրն է պատրաստ մեզ աջակցել թեյի աճեցման վերածնունդի և զարգացման գործում»,- նշել է Դանելիան:
Նախարարը նշել է, որ Չինաստանը կօգնի «թեյի արտադրության և վերամշակման ժամանակակից տեխնոլոգիաների անցնելու, թեյի համապատասխան սորտեր աճեցնելու գործում»:
Դանելիան հայտնել է, որ «Վրաստանում թեյի աճեցման վերածնունդի և զարգացման պետական ծրագիր է մշակվել»: «Արդեն որոշակի աշխատանքներ են տարվում այդ ծրագրի իրականացման ուղղությամբ: Ծրագրի նպատակն է առաջին փուլում ապահովել երկրի թեյի ներքին պահանջմունքները, իսկ հետագայում՝ թեյ արտահանել այլ երկրներ»,- նշել է նա:
