Հունաստանի վարչապետ Ալեքսիս Ցիպրասը հայտարարել է, որ չի հավատում ԵՄ-ի հետ ձեռք բերված համաձայնագրի հաջողությանը։ Այն վերաբերում է պարտքային ճգնաժամից երկրի դուրսբերմանը։ Վարչապետը, սակայն, նշել է, որ կներդնի բոլոր ջանքերը, որպեսզի այն իրականացվի։ Այս մասին վարչապետը հայտարարել է հունական հեռուստաալիքի եթերում՝ փոխանցում է Reuters գործակալությունը։
«Ես լիովին գիտակցում եմ իմ պատասխանատվությունը փաստաթղթի ստորագրման համար, որին չեմ հավատում, որը, սակայն, պարտավոր եմ կատարել»,- նշել է Ցիպրասը։ Նրա խոսքով՝ մի շարք պետություններ, մասնավորապես՝ Ֆինլանդիան և Նիդերլանդները, դեմ են արտահայտվել Հունաստանի հերթական վարկի տրամադրմանը, սակայն արդյունքում փոխել են իրենց դիրքորոշումը։
Ցիպրասը խոստովանել է, որ բանակցությունները հեշտ չեն եղել ոչ մեկի համար, սակայն եթե Հունաստանը չընդուներ վարկատուների պայմանները, ապա իրավիճակը երկրում կզարգանար վատագույն սցենարով։ Նա ընդգծել է, որ պաշտպանել է հույների աշխատավարձերն ու կենսաթոշակները։
