Թուրքական մամուլը անդրադարձել է Երևանի կենտրոնում անցկացված բողոքի ակցիային, որի մասնակիցներն իրենց բողոքն են հայտնում էլեկտրաէներգիայի թանկացման դեմ:
Թուրքական Anadolu լրատվական գործակալությունը գրել է, որ հազարավոր ցուցարարներ երթևեկության համար փակել են Բաղրամյան պողոտան և շրջապատել են նախագահական պալատը: Ակցիայի վայրում կենտրոնացվել են հարյուրավոր ոստիկաններ, բերվել են ջրցան մեքենաներ: Ցուցարարների նկատմամբ այսօր առավոտյան կիրառվել են ջրաշիթեր: Կան մեծ թվով ձերբակալվածներ:
Լրատվամիջոցը հիշեցնում է, որ էլեկտրաէներգիայի գնի թանկացման դեմ բողոքի ակցիաները Երևանի «Ազատության» հրապարակում մեկնարկել են հունիսի 19-ին: Օգոստոսի 1-ից էլեկետրաէներգիայի սակագինը թանկանալու է 16 տոկոսով: Որոշ լրատվամիջոցներ գրում են, որ բողոքի ակցիային մասնակցել են տասնյակ հազարավոր մարդիկ:
Երևանի կենտրոնում անցկացված բողոքի ակցիային ու ոստիկանների միջամտությանն անդրադարձել են նաև Ստամբուլի հայկական «Ակօս» թերթը, Son dakika լրատվական կայքը, Dünya Bülteni լրատվական կենտրոնը, Zaman օրաթերթը, Taraf թերթը, Cihan լրատվական գործակալությունը, Sputnik լրատվական գործակալության թուրքական ծառայությունը, Yeni Asya թերթը, TRT Türk-ը, CNN Türk-ը, Ülke Haber-ը, T24, Son Gündem կայքերը և այլ լրատվամիջոցներ:
