Գիտնականներն ուղեղում «կորած» լեզու են գտել՝ հայտնում է direct-press.ru-ն: Նոր հետազոտության հեղինակները կարծում են, որ նորածինների մոտ մայրենի լեզուն ստեղծում է, այսպես կոչված, նեյրոնային կառուցվածքներ, որոնք ուղեղը երկար տարիներ անգիտակցաբար պահպանում է, եթե նույնիսկ փոքրիկը դադարում է այն ընդհանրապես լսել: Տվյալ հետազոտությունն առաջին անգամ ապացուցում է, որ «կորած» լեզվի հետքերը մնում են մեր ուղեղում:
«Նորածնային ուղեղը պատկերացում է ձևավորում լեզվական ձայների մասին, բայց մենք ցանկանում էինք իմանալ՝ արդյոք ուղեղն այդ պատկերացումները պահպանո՞ւմ է կյանքի հետագա ընթացքում, նույնիսկ եթե մարդն այլևս չի լսում այդ լեզուն»,- ասում է Լարա Փիրսը:
Տվյալ հետազոտության շրջանակներում կատարվել է 9-17 տարեկան 48 աղջկա գլխուղեղի ֆունկցիոնալ մագնիսա-ռեզոնանսային տոմոգրաֆիա: Երեխաները 3 խմբի են բաժանվել: Առաջին խմբում եղել են աղջիկները, որոնք ծնվել և մեծացել են ֆրանսալեզու ընտանիքում: Երկրորդ խմբում ընդգրկվել են չինական ընտանիքներից երեխաներ, որոնց հետո որդեգրել են ֆրանսալեզու ընտանիքները, և որոնք հետագայում դարձել են բացառապես ֆրանսախոս: Երրորդ խմբում եղել են աղջիկներ, որոնք ևս որդեգրված են եղել, բայց միաժամանակ ազատորեն խոսել են երկու լեզուներով (չինարեն և ֆրանսերեն):
Ուղեղի սքանավորումն արվել է այն ժամանակ, երբ նրանք չինարեն բառեր են լսել:
«Սքանավորման ժամանակ մեզ ապշեցրեց որդեգրված աղջիկների ուղեղի ակտիվացումը, որոնք բոլորովին մոռացել էին չինարենը: Նրանց արդյունքները համապատասխանել են այն երեխաների ուղեղի պատկերին, որոնք շարունակել են չինարեն խոսել ծննդից ի վեր: Նեյրոնային կառուցվածքները, հնարավոր է, ձևավորվել են նրանց կյանքի արդեն առաջին ամիսներին: Այդ պատկերը լիովին տարբերվում էր առաջին խմբից՝ միալեզու ֆրանսախոս խմբից»,- նշում է Փիրսը:
Այս հետազոտությունը ցույց է տալիս, որ ավելի վաղ ձեռք բերված տեղեկությունը ոչ միայն պահպանվում է մարդու ուղեղում, այլև տարիների ընթացքում ազդում է տեղեկատվության մշակման վրա: Այս արդյունքները կարող են հակասել լեզվի յուրացման ոլորտում եղած փաստարկներին, թե՝ նեյրոնային կապերը երկար ժամանակ չօգտագործելու դեպքում կկորչեն ուղեղից:
