Ազգային ժողովում 2014թ. բյուջեի կատարողականի վերաբերյալ Վերահսկիչ պալատի եզրակացությունը ներկայացնում էր այդ կառույցի խորհրդի անդամ Սեյրան Ավագյանը: ՀԱԿ խմբակցության ղեկավար Լեւոն Զուրաբյանը կրկին անգամ հարց բարձրացրեց, թե ո՞ւր է ՎՊ նախագահ Իշխան Զաքարյանը:
«Ի՞նչ է պատահել Իշխան Զաքարյանին: Օրենքում նշված է, որ բյուջեի կատարողականն անձամբ չներկայացնելը մի քանի դրդապատճառներ պետք է ունենա: Եթե նրա կողմից պաշտոնեական պարտականությունները չկատարելու հանգամանքները պարզված չեն, եթե նրա պաշտոնի թափուր լինելու մասին տեղեկություններ չկան, ապա ո՞ւր է նա: Եթե այս հանգամանքներից որեւէ մեկը հաստատված չէ պաշտոնական տեղեկություններով, ապա ինչո՞ւ են խախտվում օրենքի պահանջները: Ի վերջո, այս հարցի մեջ պարզաբանումներ պետք է մտցվեն, այլապես ստացվում է, որ նա արհամարհում է ԱԺ-ն: Պե՞տք է, ի վերջո, հասկանանք նրա անհետացման առեղծվածը»,- իր հարցերը բարձրաձայնեց Լ. Զուրաբյանը:
ԱԺ նախագահ Գալուստ Սահակյանն արձագանքեց պատգամավորի այս հարցադրմանը եւ հայտարարեց, թե ցանկալի կլիներ, եթե Ի. Զաքարյանին դուք էլ հանդիպեք: «Խոսքը չի վերաբերում հաշվետվությանը: Ես էլ եմ կիսում ձեր հարցադրումը, որ առաջին դեմքերով պետք է գերատեսչությունները հանդես գան: Դուք ամեն անգամ կրկնում եք ձեր հարցը, որով օգնում եք ինձ ու ԱԺ-ին: Եթե այդքան շատ ցանկալի է ձեզ համար Ի. Զաքարյանը, մի առիթով հրավիրեմ, զրուցեք: Վստահեցնում եմ՝ նա քաղաքում է, իր աշխատավայրում է, երեկ խոսել եմ հետը, հորդորել, որ ներկա լինի, սակայն դա իրենց իրավասությունների տակ է»,- ասաց Գ. Սահակյանը:
Ի վերջո, ո՞ւր է Իշխան Զաքարյանը՝ հարցը ուղղեցինք Սեյրան Ավագյանին:
– Պարոն Ավագյան, Ազգային ժողովում 2014թ. բյուջեի կատարողականին Վերահսկիչ պալատի եզրակացությունը Դուք ներկայացրեցիք: Այսինքն՝ խորհրդարանում ՎՊ-ի հերթական ներկայացմանը ՎՊ նախագահ Իշխան Զաքարյանը կրկին ներկա չէր: Ինչո՞ւ է նա խուսափում ԱԺ գալուց:
– Եկեք խոսենք այսօրվա թեմայի մասին: Մենք խորհրդարան գալիս ենք երկու թեմայով՝ Վերահսկիչ պալատի հաշվետվության առիթով, եւ մենք այստեղ ներկայացնում ենք կառավարության հաշվետվության վերաբերյալ մեր եզրակացությունը:
– Ամեն դեպքում Ի. Զաքարյանը վերջին շրջանում խուսափում է գալ Ագային ժողով եւ պատասխանել պատգամավորների հարցերին:
– Դա ձեր գնահատականն է: Ես համաձայն չեմ ձեր գնահատականների հետ, որովհետեւ հանձնաժողովներում ՎՊ անցած տարվա հաշվետվությունը մամուլի ներկայությամբ ներկայացրել է պարոն Զաքարյանը եւ պատասխանել է բոլոր հարցերին:
– Իսկ այսօր որտե՞ղ էր պարոն Զաքարյանը, որ չի եկել ԱԺ:
– Այսօր Հայաստանում էր գտնվում մեր կոլեգաների մի պատվիրակություն: Նախապատրաստվում է INTOSAI-ի՝ աշխարհի բարձրագույն վերահսկիչ պալատների համագումարը, որը տեղի է ունենալու հաջորդ տարի: Պարոն Զաքարյանն ընդունել է այդ պատվիրակությանը, բավականին պատկառելի պատվիրակություն է, եւ աշխատում է նրանց հետ: Այդ մասին տեղյակ է պահել ԱԺ նախագահին, եւ ՎՊ խորհուրդն արտահերթ կարգով որոշել է, որ քանի որ Ի. Զաքարյանը զբաղված է, եզրակացությունը ես ներկայացնեմ: Հատկապես, որ այս թեման խորհրդի անդամներից ես եմ համակարգում եւ տեղյակ եմ մանրամասներին: Թեեւ խորհրդի անդամներից ով էլ գար, պիտի ներկայացներ այս զեկույցը:
– Այսինքն՝ ձեր գործընկերներին դիմավորելը, ընդունելն ու ուղեկցելը Ի. Զաքարյանի համար ավելի՞ կարեւոր է, քան խորհրդարանում բյուջեի մասին եզրակացություն ներկայացնելն ու պատգամավորների հարցերին պատասխանելը:
– Ես կարծում եմ, այստեղ խոսքը կարեւորությանը չէ, որ վերաբերում է, եւ դա չէ, որ շեշտվում է: Ես ասացի, որ աշխարհի պատկառելի մի պատվիրակություն կա, եւ հարցը կոռեկտությանն է վերաբերում: Այստեղ մենք ենք, եւ խորհրդարանում հաշվետվությունը ես կներկայացնեմ, թե մեկ ուրիշը՝ որեւէ բան չի փոխում: Բայց մենք այս պահին աշխարհի պատվիրակությունն ենք ընդունում: Կարծում եմ, որ մենք շատ մեծ խնդիր չենք առաջացրել, հատկապես, ինչպես տեսնում եք, դահլիճում չհնչեց մի հարց, որը մանրամասն չմեկնաբանվեր:
– Պատգամավորները, օրինակ՝ ՀԱԿ խմբակցության ղեկավար Լեւոն Զուրաբյանը, հարց է բարձրացնում, որ Ի. Զաքարյանին միգուցե թույլ չեն տալիս խորհրդարան գալ: Եվ որ դրա պատճառը 2013թ. ՎՊ հաշվետվության աղմկոտ քննարկումն էր, թե բյուջեի 70 տոկոսը գտնվում է կոռուպցիոն ռիսկի գոտում:
– Պարոն Զուրաբյանը պարզապես պետք է մի փոքր ավելի ջանք թափի եւ մեզ ներկայացնի, թե դա ինչպես է իրավաբանորեն հնարավոր իրականացնել: Միջնադարում չենք ապրում, ինչ է նշանակում անկախ մարմնի առաջին դեմքին թույլ չտալ գալ Ազգային ժողով: Լավ չեմ հասկանում եւ չեմ էլ պատկերացնում, թե դա ինչպես է հնարավոր անել:
– Ոչ թե իրավաբանորեն, այլ ներքին կարգով միգուցե հանձնարարվել է, որ չներկայանա խորհրդարան եւ աղմկոտ հաշվետվություններ չներկայացնի կամ պատգամավորների հետ աղմկոտ հարցուպատասխանի մեջ չմտնի:
– Ես նորից պետք է ասեմ, որ այդ ներքին կարգերն ինձ համար անհասկանալի են՝ չնայած պետական բարձր պաշտոնների իմ 25 տարվա աշխատանքային փորձին: Չի կարող այդպիսի բան տեղի ունենալ: Չեմ հավատում:
– ՎՊ-ի 2013թ. հաշվետվության ներկայացման ժամանակ էլ Ի. Զաքարյանը արձակուրդ էր գնացել: Եվ այդպիսով իր արձակուրդն ավելի էր կարեւորել, քան խորհրդարանում իր ղեկավարած կառույցի հաշվետվությունը ներկայացնելը:
– Ի. Զաքարյանը հիմա Երեւանում է, առավոտը ժամը 10-ին մենք իրար հետ զրուցել ենք: Մենք ունենք մամուլի հետ կապի հատուկ կառույց, եւ ցանկացած պահի կարող եք զանգահարել, պայմանավորվել եւ նրան ուղղել ձեր հարցերը:
– Գոնե ՎՊ 2014 հաշվետվությունն Ի. Զաքարյանն ի՞նքը կներկայացնի խորհրդարանին, թե՞ դա էլ նրա փոխարեն կանի խորհրդի անդամներից մեկը:
– Ես կարծում եմ, որ ինքը կներկայացնի, եթե որեւէ արտառոց բան այդ օրը հանկարծ չլինի, ինչպես՝ այսօր:
– Եթե հանկարծ այդ օրն էլ չորոշի արձակուրդ գնալ:
– Չեմ կարծում:
