Տաքսիստները փոխոստիկանապետից պահանջեցին հատուկ տաքսիների համար կայանատեղիներ սահմանել

Այսօր մի խումբ անհատ տաքսիստներ հանդիպեցին ՀՀ ոստիկանապետի տեղակալ Սամվել Հովհաննիսյանի հետ՝ խնդրանքով, որ քաղաքում սահմանեն տաքսիների համար հատուկ առանձնացված կայանատեղիներ, որտեղ հնարավոր կլինի կանգնել և չտուգանվել:

Բանն այն է, որ, ըստ տաքսիստների, այսօր իրենք հնարավորություն չունեն քաղաքի բազմաթիվ հատվածներում կանգնել, ուղևոր վերցնել, իջեցնել՝ անմիջապես տուգանվում են 5 հազարական դրամով, իսկ դա օրվա մեջ մի քանի անգամ կարող է կրկնվել:

Տաքսիստներն անգամ իրենց հետ քաղաքի տարբեր հատվածներում արված լուսանկարներ էին բերել՝ խնդրելով հնարավորության սահմաններում այդ հատվածներում կայանատեղիներ սահմանել:

Փոխոստիկանապետ Սամվել Հովհաննիսյանը խոստացավ ուսումնասիրել խնդիրը: «Ներկայացրեք ցուցակ, թե որտեղ եք ուզում, որ կայանատեղի ձևավորվի: Մենք կուսումնասիրենք ցուցակը, կհամադրենք մեզ մոտ եղածի հետ: Ու եթե հնարավոր լինի նոր առաջարկները իրագործել, ապա քաղաքապետի որոշումը կլինի, կայանատեղին կկահավորվի, և դուք կիրականացնեք ձեր գործառույթը»,- ասաց Հովհաննիսյանը՝ հավելելով, որ իր հրահանգով մասնակի խախտումները չեն ֆիքսվում:

Վարորդները նաև մինչ այս նշված խախտումների համար սահմանված տուգանքների համաներման հարց բարձրացրին, սակայն Ճանապարհային ոստիկանության մեկ այլ աշխատակից նշեց, որ դա հնարավոր չէ: «Առաջիկայում համաներման ակտ չի ընդունվի, և ես հորդորում եմ բոլոր վարորդներին, ովքեր ունեն տուգանքներ, մինչև հուլիսի 9-ը վճարել, քանի որ դրանից հետո կվերականգնվի օրենքի կիրառման նախկին ձևը»,- ասաց նա:

Տաքսիստները գոհ հեռացան՝ հույս ունենալով, որ քաղաքապետարանի ու ճանապարհային ոստիկանության համագործակցությունն ու խոստումները առաջիկայում տեսանելի կլինեն:

 

Առավել մանրամասն՝ տեսանյութում։