Գլխավոր դատախազ Գևորգ Կոստանյանը Աժ նիստից հետո լրագրողների հետ ճեպազրույցում մանրամասնել է, թե ինչով էին զբաղված իրավապահ մարմինները, երբ Սյունիքի մարզպետ Սուրիկ Խաչատրյանի որդին հանցագործությունը կատարելուց օրեր անց շատ հանգիստ լքել էր Հայաստանը:
«Առաջին լրատվական»-ի այն հարցին, թե ինչո՞ւ է Տիգրան Խաչատրյանը վկայի կարգավիճակում ներգրավված քրեական գործում, երբ հավաստիացումներ կան, որ նա է վնասել, արդեն՝ հանել տուժողի աչքը, Կոստանյանը խոստացավ երկուշաբթի օրը պահանջել նախաքննական մարմնից գործը և տեսնել՝ ով ինչ քննություն է արել, և արդյո՞ք ճիշտ իրավական գնահատականներ են տրվել. «Քրեական գործը թող քննեն, Քննչական կոմիտեն լավ ա քննում, հետո արդյունքները ես կգնահատեմ»,- եզրափակեց Կոստանյանը: Թե ինչ կպարզի Կոստանյանը երկուշաբթի օրը, դժվար չէ կռահել՝ հաշվի առնելով հասարակության գլխին չարիք դարձած Սուրիկ Խաչատրյանի և իր որդու նկատմամբ պետական մակարդակով ամենաթողությունը: