«Առաջին լրատվական»-ին հայտնի է դարձել, որ հունիսի 7-ին Աբովյանի քաղաքապետի ընտրություններում առաջադրված երկրորդ Արթուր Գեղամի Հարությունյանը, որին, ամենայն հավանականությամբ, ծառուկյանական թիմն է ներքաշել ընտրապայքարի մեջ, «Վեդի Ալկո» ընկերության տնօրեն Մանվել Ղազարյանի մորաքրոջ որդին է: Նա տևական ժամանակ բնակվելիս է եղել Բելգիայում, որտեղից 2 տարի առաջ է վերադարձել և գյուղերից մեկում անասնապահությամբ է զբաղվում:
Նույն տեղեկությունների համաձայն՝ ծառուկյանական թիմին նշված անձնավորությանը հայտնաբերելու և ընտրապայքարի մեջ ներքաշելու գործում աջակցել է Հովիկ Աբրահամյանը, քանի որ «Վեդի Ալկոյի» սեփականատերը նրա մտերիմ շրջապատից է:
Հիշեցնենք, որ Աբովյանի քաղաքապետրի ընտրություններում առաջադրվել է երկու Արթուր Գեղամի Հարությունյան անուն-ազգանուն-հայրանունով թեկնածու, որոնցից մեկը հայտնի Պալաչն է, իսկ մյուսը՝ ձևական թեկնածու, որը պետք է անուն-ազգանվան շփոթության արդյունքում տանի Պալաչի ձայները:
Նշենք նաև, որ այս ընտրություններում առաջադրվել է ևս 4 թեկնածու: Իշխանական կուսակցությունը որոշում է կայացրել պաշտպանել Ծառուկյանի թեկնածուին՝ Վահագն Գևորգյանին:
