Հայաստանում Լեհաստանի արտակարգ և լիազոր դեսպան Եժի Նովակովսկին հույս է հայտնում, որ Հայաստանի և Ադրբեջանի միջև լայնամասշտաբ պատերազմ չի սկսվի:
«Առաջին լրատվական»ի այն հարցին, որ եթե հակամարտության խաղաղ կարգավորումը Եվրամիության համար առաջնահերթություն է , ի՞նչ քայլեր է դրա համար իրականացնում ԵՄ-ը, դեսպանը պատասխանեց. « Մենք կողմ ենք հակամարտության խաղաղ կարգավորմանը, և Լեհաստանն աջակցում է Մինսկի խմբի գործողություններին: Գտնում ենք, որ կողմերի ուղղակի շփումների արդունքում այդ հարցը պետք է կարգավորվի: Չէ՞ որ հենց դեսպան Կասպրշիկը ԵԱՀԿ գործող նախագահի հատուկ ներկայացուցիչն է և նա ուղղակիորեն ներգրավված է այս գործընթացում»,-ասաց նա:
Դեսպանն ընդգծեց, որ Լեհաստանի համար ընդունելի է հակամարտության կարգավորման բացառապես խաղաղ ճանապարհը. « Հուսով ենք, որ պատերազմի վերսկսման հավանականություն չկա, պատերազմը ողբերգական իրադարձություն կլինի, դրա հետևանքով մահանում են հենց երիտասարդները»,-ասաց նա:
Ինչ վերաբերում է մայիսի երեքին Լեռնային Ղարաբաղում անցկացված խորհրդարանական ընտրություններին և aravot.am-ի այն հարցին, թե ի՞նչ տեսակետ ունի այդ ընտրությունների մասին, դեսպանն արձագանքեց. « Ցավոք սրտի, մեր դիրքորոշումն այս հարցին նույնն է, ինչ Եվրամիության դիրքորոշումը: Քանի որ մենք չենք ճանաչում Լեռնային Ղարաբաղը որպես պետություն, այդ իսկ պատճառով զերծ ենք մնում որևիցե մեկնաբանություններից»:
Դեսպան Նովակովսկին անդրադարձավ նաև այս ամսվա վերջին Ռիգայում անցկացվելիք ԵՄ արևելյան գործընկերության գագաթնաժողովին: «Առաջին լրատվական»-ի այն հացրին, որ եթե նույնիսկ եվրոասոցացված Վրաստանն ու Ուկրաինան չեն ստանում ազատ վիզային ռեժիմ, ի՞նչ կարող է ակնկալել ԵՏՄ անդամ Հայաստանը, դեսպանը պատասխանեց. «Անկեղծ ասած, դա այնպիսի մի գործընթաց է, որ կախված է բազմաթիվ գործոններից, յուրաքանչյուր երկրին ներկայացված է պահանջների մի ցանկ, եթե տվյալ երկիրը կատարում է այդ պահանջները ապա վիզային ազատ ռեժիմի գործածությունը հնարավոր է: Դուք նշեցիք Վրաստանի և Ուկրաինայի օրինակը, բայց կա նաև Մոլդովայի օրինակը, որն ունի ազատ վիզային ռեժիմ»:
Ինչ վերաբերում է Հայաստանին, դեսպանն ասաց, որ լիահույս է, որ Ռիգայի գագաթնաժողովին Հայաստանը կհասնի Եվրամիության հետ սերտ համագործակցության.«Մենք միանշանակ այն ջատագովներն ենք, որ Հայաստանը սերտ հարաբերություններ ունենա ԵՄ-ի հետ կարճ ժամանակահատվածում։ Իհարկե, Հայաստանի անդամակցությունը Եվրասիական տնտեսական միությանը չի կարող դյուրացնել գործընթացը, քանի որ տնտեսական մասով համագործակցությունը Հայաստանի դեպքում դժվար է»,-եզրափակեց նա:
