Թուրքիայի իշխող «Արդարություն և զարգացում» կուսակցությունից պատգամավորության թեկնածու, ազգությամբ հայ լրագրող, վերլուծաբան Մարգար Եսայանը թուրքական «Սաբահ» թերթի հետ զրուցել է պատգամավոր դառնալու իր որոշման, Թուրքիայի հայերի շրջանում իր թեկնածության վերաբերյալ արձագանքների և այլնի մասին:
Խոսելով անցյալի և ներկայի Թուրքիայում հայերի վիճակի մասին՝ Եսայանը նշել է, որ «իր մանկության տարիներին հայերը կարող էին առաջ գնալ միայն առևտրի և մի փոքր էլ գիտական ոլորտներում, սակայն այլ ոլորտները նրանց առաջ փակ էին, իսկ մեր օրերում հնարավորություն կա տարբեր ոլորտներում ինքնադրսևորվել»:
Պատասխանելով այն հարցին, թե ինչու է ընտրել ԱԶԿ-ն, հայ թեկնածուն նշել է, որ «այն միակ քաղաքական ուժն է Թուրքիայում, ով իթթիհատական (երիտթուրքական) կողմնորոշում չունի»:
«Եթե ընտրեի «Ժողովրդա-հանրապետական» կուսակցությունը, ապա ինքս ինձ կկործանեի: Իսկ «Ժողովուրդների դեմոկրատական» կուսակցությունն ինձ հիասթափեցրել է: Տեսնում եմ, որ ժողովրդավարության տեսանկյունից ԱԶԿ-ն այլընտրանք չունի»,- նշել է Եսայանը:
Անդրադառնալով իր առաջադրման հարցում հայերի վերաբերմունքին՝ Եսայանը նշել է, որ «հայ համայնքը մեծ աջակցություն է ցուցաբերում իր թեկնածությանը»:
«Շատ լարված նախընտրական աշխատանքներ ենք իրականացնում: Այցելում եմ հայկական հիմնադրամներ, կառույցներ, զրուցում մարդկանց հետ: Շատ մեծ աջակցություն ունեմ»,- նշել է Եսայանը՝ հավելելով, որ ԱԶԿ-ին աջակցում է «երեսունն անց հայերի զգալի մասը, մինչդեռ ավելի փոքր տարիքի հայերի վրա որոշակի ազդեցություն են թողել Գեզիի դեպքերը, սակայն վերջիններիս փորձում են համոզել հակառակը»:
Հիշեցնենք, որ Թուրքիայի խորհրդարանական ընտրություններին մասնակցելու է 4 հայ թեկնածու, բոլորն էլ պայքարելու են Ստամբուլում: Թուրքիայի իշխող «Արդարություն և զարգացում» կուսակցությունը հայ լրագրող, գրող Մարգար Եսայանի, իսկ ընդդիմադիր քեմալական «Ժողովրդա-հանրապետական» կուսակցությունը Սելինա Օզուզուն Դողանի թեկնածություններն են առաջադրել: Քրդական «Ժողովուրդների դեմոկրատական» կուսակցության համամասնական ցուցակներում երկու հայ թեկնածու կա՝ Կարո Փայլանն ու Մուրադ Մըհչըն:
