Թուրքական «Միլիյեթ» պարբերականում Նիհաթ Ալի Օզջանի հեղինակած «Հայերի տեղահանության՝ աչքաթող արված կողմը» հոդվածում առաջ են քաշվում Ցեղասպանությունը ժխտող թեզեր, իսկ հեղինակը փորձում է Թուրքիայում Հայոց ցեղասպանության ճանաչումը տեղավորել «ժողովրդավարության և ոչ ժողովրդավարության» շրջանակներում:
Օզջանը նշում է, թե այս տարի Հայոց ցեղասպանության վերաբերյալ պնդումները բավական քննարկվել են ինչպես Թուրքիայի ներսում, այնպես էլ երկրի սահմաններից դուրս, ավելացել են Ցեղասպանությունը ճանաչող երկրների թիվը, իսկ առաջիկայում քննարկումները միայն շարունակվելու միտում ունեն:
«Հետաքրքիր է, որ «Հայոց ցեղասպանության» (բնօրինակում հեղինակը Հայոց ցեղասպանությունն առել է չակերտների մեջ.- խմբ.) հիման վրա սկսվել են ժողովրդավարության թեստեր անել: Մարդիկ, ովքեր պաշտպանում են ցեղասպանության թեզը, կոչվում են «ժամանակակից ժողովրդավարներ», ովքեր չեն ճանաչում՝ «ժողովրդավար չեն»: Այսպիսով, այս մոտեցումը ցեղասպանության վերաբերյալ քննարկումը պատմական, ռազմական, իրավական, մարդկային դաշտից տեղափոխվում է գաղափարական և քաղաքական դաշտ: Մինչ այս ցեղասպանության թեման հիմնականում քննարկվում էր իրավունքի և քաղաքականության շրջանակներում: Ավելի քիչ և աչքաթող արվածը ռազմական տեսանկյունից հարցի քննարկումն է»,- գրում է թուրք հեղինակը, ով այնուհետև սկսում է Հայոց ցեղասպանության փաստը ժխտող մտքեր առաջ քաշել:
«Հայերը սեփական քաղաքական նպատակների համար են ապստամբել: Կառավարությունն էլ որպես քաղաքական և ռազմական կանխարգելիչ քայլ տեղահանության որոշումն է կայացրել: Սա համապատասխանում էր այդ ժամանակ ապստամբությունները ճնշելու մոտեցումներին: Երկու կողմն էլ չկարողացավ խույս տալ քաղաքական, մարդկային և ռազմական արդյունքներից: Սա է 1915-ին տեղի ունեցածը: Այսօրվա արժեքներով պատմության վերաբերյալ դատողություններ անելը ոչ թե «ժողովրդավարության», այլ կողմնապահության չափանիշ է»,- գրում է «Միլիյեթի» հոդվածագիրը:
Նշենք, որ թուրքական հեղինակավոր «Միլիյեթ» թերթում կարելի է հանդիպել ինչպես թուրքական ժխտողական թեզերը պաշտպանող հոդվածագիրների, այնպես էլ պատմական ճշմարտության մասին բարձրաձայնող հեղինակների:
