Ադրբեջանում արշավ է սկսվել ժողովրդական գրող, մշակույթի պատվավոր գործիչ Աքրամ Այլիսլիի դեմ, որը ռուսական «Դրուժբա նարոդով» ամսագրի դեկտեմբերյան համարում տպագրել էր հատված «Քարե երազներ» վեպից: Այն նվիրված է Ադրբեջանում ապրած հայերին, իսկ նախաբանում գրված է. «Նվիրվում է իմ հայրենակիցների հիշատակին, ովքեր իրենցից հետո թողել են չսպիացած ցավ»:
Օրերս մի ռուսական պարբերականի տված հարցազրույցում գրողն ասել է. «Ես չեմ զղջում, որ գրել և հրապարակել եմ «Քարե երազներ» վեպը: Սա իմ կյանքի մի մասն է: Նրանք, սակայն, ցանկանում են, որ ես հրաժարվեմ իմ ստեղծագործություններից, ասեմ` սխալվել եմ: Նման բան ես չեմ անի: Ես լիովին վստահ եմ, որ իմ ժողովրդին ոչ թե ստորացնում, այլ վեհացնում եմ»:
Այլիսլին կոչով դիմել է հայերին՝ ասելով, որ իր ստեղծագործությունը հայերին ուղղված «մեսիջ է», որի նպատակն է միավորել ժողովուրդներին. «Ես խոստովանում եմ մեր սխալները, դուք էլ ձերը խոստովանեք: Թող ձեր գրողներն էլ գրեն այդ մասին: Հայ գրողները պետք է այդ մասին խոսեն: Կարծում եմ, որ հայերի մեջ կան մարդիկ, որոնք այդ մասին խոսում են: Դա շատ կարևոր է ժողովուրդների մերձեցման համար»,-ասել է գրողը:
Արձագանքելով ադրբեջանցի գրող Աքրամ Այլիսլիի կոչին՝ դրամատուրգ, հրապարակախոս Կարինե Խոդիկյանն ասաց, որ ցանկացած ժողովրդի միջից պետք է լինի այն մեկը, այն վճռականը, ով առաջինն ասի այն, ինչ մյուսները նույնիսկ մտքում վախենում են իրենք իրենց խոստովանել: Նրա հավաստիացմամբ՝ ոչ այնքան մեծ ծավալի գրական գործով առաջին քայլը հենց Հայաստանի կողմից է եղել Լևոն Ջավախյանի «Քիրվա» պատմվածքով:Դրամատուրգի գնահատմամբ՝ երկու երկրների հսկա այսբերգը ջարդվեց այդ քայլով: «Ես հավատում եմ, որ կլինեն քայլեր և այս, և այն կողմից, որովհետև երկու հարևան պետություններըմի օր պետք է նստեն սեղանի շուրջ, և դրա առաջին քայլերը, ամենադժվար, ամենաշատ քարկոծվող, ամենամեծ ուժ պահանջող քայլերը դրված են մտավորականության վրա, գրողի վրա, որովհետև ի սկզբանե բանն էր, խոսքը: Հավատում եմ, որ երկու կողմերից էլ քայլեր կլինեն, որովհետև երկրի վրա ոչինչ հավերժական չէ, այդ թվում և պատերազմները»,- կարծիք հայտնեց Կարինե Խոդիկյանը՝ եզրափակելով, որ պատերազմները սկսում են քաղաքական գործիչները, ավարտն ազդարարում գրողները:
Հիշեցնենք, որ գրող Լևոն Ջավախյանն իր «Քիրվա» պատմվածքի համար ադրբեջանական մրցանակ է ստացել:
