Վերջին մի քանի տարին Ռուսաստանի նախագահ Վլադիմիր Պուտինը «ագրեսիվ ազգայնական գաղափարախոսություն է կառուցել, ԶԼՄ-ների վրա համընդհանուր գերակայության և Ուկրաինայում հիբրիդային պատերազմի օգնությամբ այլընտրանքային իրականություն է ստեղծել», Newsweek-ի համար հոդվածում գրում է Էդրիան Կարատնիցկին: Միևնույն ժամանակ, լինելով խորհրդային հատուկծառայությունների աշակերտ, նա նախընտրում է գաղտնի գործել, ինչն ինքնին խնդրահարույց է «պրոպագանդայով գործի գցվող ռեժիմի» համար, առավել ևս, եթե առաջադրանք է դրվում ստեղծել «ուժեղ, անողոք առաջնորդի՝ լավ տղայի կերպար՝ պատրաստ ուժ կիրառելու աշխարհում Ռուսաստանի ազդեցությունը տարածելու համար»:
«Այդ անհամապատասխանությունից ինչ-որ կերպ գլուխ հանելու համար Պուտինը չափազանց պերճախոս ազդանշանների հավաքածու է ստեղծել, որոնք օգտագործվում են ռուս հասարակության և ազգային էլիտաների, ինչպես նաև միջազգային հանրության հետ հաղորդակցության համար,- գրում է հեղինակը:- Վերջին մի քանի շաբաթն պուտինյան այդ կոդը մի քանի անգամ ուշագրավ կերպով ցուցադրվել է Մոսկվայում»:
Այսպես, «զինվորներին, որոնց, ամենայն հավանականությամբ, գաղտնի ուղարկել են կռվելու Ուկրաինայի արևելքում, շնորհակալության լուռ նշան» էր ռուսական բանակի 3 միավորումներին գվարդիական կոչումներ շնորհելը, ինչի մասին մարտի 25-ին հայտնեց «Նովայա Գազետան»: Մարտի 15-ին Պուտինը երևաց «ճանապարհ տուն» փաստագրական ֆիլմում. դա ևս «հզոր կոդավորված ուղերձ էր ռուսներին», կարծում է հոդվածագիրը:
Ըստ նրա՝ նույն շարքում է նաև Ռամզան Կադիրովին մարտին Պատվո շքանշանով պարգևատրումը, որը դրանից ոչ շատ առաջ «Ռուսաստանի հայրենասեր» էր անվանել Բորիս Նեմցովի սպանության համար կասկածվող Զաուր Դադաևին:
Կադիրովի հետ նույն օրը շքանշան է ստացել Անդրեյ Լուգովոյը՝ ռուսական հատուկծառայությունների նախկին գործակալը, որին Մեծ Բրիտանիան ուզում է դատել որպես Ալեքսանդր Լիտվինենկոյի սպանության մասնակցի: Դա արդեն ազդանշան էր միջազգային հանրությանը, նշում է հեղինակը, «մրցանակը խոսում է հարգանքի մասին, որը վայելում է գործակալը»:
«Այս ամենը ակնհայտ պատկերազարդումն է նրա, թե իրեն ինչպես է պահում Պուտինը,- շարունակում է հոդվածագիրը:- Իրական ուղերձն այսպիսին է՝ ես և իմ հատուկծառայությունները Ռուսաստանի հզորության ավելացման գաղտնի աշխատանք ենք տանում: Երբեմն ես ստիպված եմ լինում գաղտնի գործել Ռուսաստանի առջև առկա նպատակներին հասնելու համար: Վաղ թե ուշ ամեն ինչի մասին բաց կասվի, եթե դուք ինձ ուշադիր լսեք: Երկերեսանիությունն այստեղ կապ չունի, դա բոլորովին նոր մի բան է: Դա թերասացությունների օրինակ է՝ ինչ-որ ժամանակ կարևոր տեղեկություն թաքցնել: Սկզբում բոլորը թաքցնում են կամ ոչ պարզ ակնարկներ անում, փոխարենը՝ հետո նվիրվածներին ամբողջությամբ բացատրում են Պուտինի մտադրությունները»:
Այդպիսի թերասացությունները, շարունակում է հեղինակը, ծառայում են ներքին պրոպագանդայի նպատակներին և միաժամանակ Պուտինին հնարավորություն են տալիս մոլորեցնել արևմտյան ղեկավարներին: Դրանք կարելի է համարել նաև նշան, որ «Պուտինը խուսափում է ռիսկերից և վախենում է անհաջողություններից ու պարտություններից: Հեղինակը եզրափակում է. «Մի շարք պատճառներով մենք գործ կունենանք Պուտինի կոդի հետ ճիշտ այնքան, որքան նա կմնա իշխանության գլուխ: Ժամանակն է տիրապետել դրա իմաստին և ուշադրությամբ լսել այդ մռայլ ազդանշանները»:
