Նախօրեին Գյումրիում Հիմնադիր խորհրդարանի անցկացրած հավաքի ժամանակ անկարգությունները չզսպելու, այլ դրանց դիտորդի կարգավիճակով մասնակցած ոստիկաններն ազատվել են աշխատանքից անգամ առանց ծառայողական քննություն նշանակելու: Այս մասին այսօր լրագրողների հետ հանդիպմանը ասաց փոխոստիկանապետ Հունան Պողոսյանը:
«Առանց ծառայողական քննության համապատասխան աշխատակիցները ամենախիստ կարգապահական պատասխանատվության են ենթարկվել անմիջապես: Այդ թվում աշխատանքից ազատվել են համապատասխան պաշտոնյաներ՝ ոստիկանության համապատասխան բաժնի պետի ծառայության գծով տեղակալը, որն ուղղակի պատասխանատու էր այդ օրվա հասարակական կարգի պահպանման համար: Որոշներն էլ տեղափոխվել են այլ աշխատանքի»,- ասաց Պողոսյանը:
«Առաջին լրատվական»-ի հարցին՝ Շիրակի ոստիկանապետի ազատումը նո՞ւյնպես պայմանավորված էր այդ օրվա իրադարձություններով, Պողոսյանը պատասխանեց: «Մարզային վարչության պետի ազատումը խնդրում եմ այդ դեպքերի հետ չկապել: Ոստիկանությունում պարբերաբար կադրային փոփոխություններ լինում են, որի համար մենք հաշվի ենք առնում մի շարք հանգամանքներ: Մենք նրա խնդիրը նշանակված մարզում համարել ենք կատարված, և ոստիկանության պետը որոշում է կայացրել ազատել նրան զբաղեցրած պաշտոնից»:
