Ռուսաստանը 2014-ի չորրորդ եռամսյակում ցուցաբերել է անսպասելի աճ, ինչը թույլ կտա նրան ապագայում գտնել տնտեսության վերականգնման միջոցներ՝ նավթի այլընտրանքային տարբերակեր՝ գրում է Bloomberg-ի տեսաբան և քաղաքական վերլուծաբան Լեոնիդ Բերշիդսկին։
«Այժմ հայտնվում են ավելի շատ նշաններ առ այն, որ ռուսական տնտեսությունը չի մահանա տանջալից մահով, որ այն վերջապես, թեև մեծ ուշացումով, սկսել է ինչ-որ ուժեղ դեղամիջոցներ ընդունել»,- գրում է նա։
Համաձայն Ռուսաստանի վիճակագրության դաշնային ծառայության՝ անցած տարվա վերջին 3 ամիսներին ռուսական տնտեսությունն աճել է 0.4 տոկոսով՝ չնայած այն բանին, որ տնտեսագետները կանխատեսել էին զրոյական աճ։ Ռուսական տնտեսության աճի պատճառների թվում Bloomberg-ն անվանում է ռուսական կառավարության ու ԿԲ-ի քաղաքականությունը, որոնք, Համաշխարհային բանկի առաջատար տնտեսագետի խոսքով՝ կարողացել են արագ որոշումներ ընդունել, որոնք հաջող կերպով կայունացրել են տնտեսությունը։
Հոդվածում նշվում է, որ Ռուսաստանն արդեն վերապրել է ուժեղագույն տնտեսական ճգնաժամն ու դեֆոլտը 1998 թվականին, սակայն ի տարբերություն այդ տարիների, այսօր Ռուսաստանի տնտեսությունն ավելի հասուն է, բիզնեսը՝ զգալիորեն ամրապնդված։
