Երևանի Սարի թաղի սողանքային գոտում ապրող բնակիչներն այսօր կառավարության շենքի մոտ բողոքի ակցիա անցկացրին: Շուրջ 10 ընտանիքներ սողանքի պատճառով ստիպված են տարիներ շարունակ ապրել ջրի մեջ ու փլուզման վտանգի տակ գտնվող տներում: Կառավարությունը դեռ 2009թ.-ին որոշում էր ընդունել նրանց Մալաթիա համայնքում կառուցվող շենքերից մեկում վերաբնակեցնել: Մարդիկ վճարումներն արել էին, բայց մինչ օրս բնակարան չեն ստացել:
Բողոքի ակցիայի մասնակիցներին հանդիպեց կառավարության քաղաքացիների ընդունելության և դիմումների քննարկման վարչության պետ Ալեքսանդր Ղազարյանը, ով երբեմն բավական կոպիտ էր արտահայտվում և նույնիսկ ձայնն էր բարձրացնում քաղաքացիների վրա: Ի վերջո՝ նա հորդորեց կրկին դիմում գրել և ներկայացնել կառավարություն՝ խնդրին լուծում տալու համար:
