Քաղաքական կուսակցությունները` ՀԿ-ների հովանավոր

Երևանի Կոմիտասի անվան պետական կոնսերվատորիայի ուսխորհրդի նախագահ Գուրգեն Բաբեյանի խոսքով, երիտասարդության շատ փոքր հատվածն է քաղաքականացված:
«Նրանք են քաղաքականացված, ովքեր նպատակ ունեն քաղաքական կարիերա ստեղծելու»,- ասում է Բաբեյանը: Ըստ նրա`Հայաստանում գործող ՀԿ-ները հետևում են որևէ քաղաքական կուսակցության և հովանավորվում են այդ ուժերի կողմից:
Անդրադառնալով հասարակության մեջ տարածված այն կարծիքին, որ համալսարանական ուսխորհուրդների նախագահներ դառնում են իշխանական կուսակցությունների ներկայացուցիչները, Գուրգեն Բաբեյանը պատասխանեց. «Ես ինքս «Հանրապետական» կուսակցության անդամ եմ, սակայն որևէ ուսանող չի կարող ասել, որ ես քաղաքական գործունեություն եմ ծավալում համալսարանում կամ որևէ խտրական վերաբերմունք եմ ցուցաբերել այլ քաղաքական հայացքներ ունեցողների հանդեպ»:
Մեր հարցին, թե ինչքանո՞վ է հասարակությունը պատրաստ քաղաքական կտրուկ փոփոխությունների` Գուրգեն Բաբեյանը պատասխանեց. «Բոլորը գիտակցում են, որ մեկ օրում ոչինչ չի փոխվի: Յուրաքանչյուրը պետք է պատրաստ լինի իր ներդրումը բերել լավ ապագայի ստեղծմանը»: